धरानमा १४ औँ संस्करणको धरान रन भव्य रूपमा सम्पन्न

धरान । खेलकुदमय र जनचेतनामूलक सन्देशसहित १४ औँ संस्करणको धरान रन यस वर्ष ह्विलचेयर रेससहित विगतभन्दा फरक र भव्य रूपमा सम्पन्न भएको छ।
धरान रनका संस्थापक सन्तोष राईका अनुसार यस संस्करणमा नेपालका विभिन्न स्थानबाट उल्लेख्य संख्यामा धावक–धाविकाको सहभागिता रहेको थियो। उनले खेलकुदमार्फत स्वास्थ्य सचेतना र सामाजिक एकता प्रवर्द्धन गर्ने उद्देश्यले यसपटक विशेष कार्यक्रमहरू समेटिएको बताए।
विजेताहरूलाई धरान उपमहानगरपालिकाका कार्यवाहक प्रमुख अईन्द्र विक्रम बेघाले पुरस्कार वितरण गरेका थिए।
१० किलोमिटर दौडको रुट पुतली लाइनबाट सुरु भई देशी लाइन, पुरानो बजार, पिण्डेश्वरी मन्दिर, विजयपुर चोक, हात्तीसार क्याम्पस, रेडक्रस भवन अमरहाट कभर्डहल हुँदै जिरो प्वाइन्ट, जानकी चोक, रङ्गशाला, गणेशमान चौक, पानी टङ्की, कल्याण चौक, मङ्गलवारे, रत्न चोक, बुद्ध चोक, दुर्गा चोक हुँदै पुनः पुतली लाइन भानुचोकमा समापन गरिएको थियो।
दौडमा चर्चित गायक राजु लामा तथा The Voice of Nepalका विजेता निता थापा मगरसहित अन्य कलाकारहरूको टिमको समेत सहभागिता रहेको थियो। कलाकारहरूको उपस्थितिले कार्यक्रम थप आकर्षक बनेको आयोजकले जनाएको छ।
धरान रनले प्रत्येक वर्षझैँ यसपटक पनि खेलकुदमार्फत स्वास्थ्य, सामाजिक सद्भाव र नगरको पहिचान प्रवर्द्धन गर्ने सन्देश दिएको छ।