इटहरीमा रहेको कोशी सेन्ट जेम्स माध्यमिक विद्यालय ले आफ्नो २९औँ वार्षिकोत्सव तथा अभिभावक दिवसलाई विद्यार्थीको प्रतिभा उत्सवका रूपमा मनाएको छ।

इटहरी, फागुन १७ — शिक्षाको लक्ष्य केवल प्रमाणपत्र हासिल गर्नु मात्र नभई विद्यार्थीभित्र निहित प्रतिभाको पहिचान र प्रस्फुटन गर्नु हो भन्ने मान्यतालाई आत्मसात गर्दै विद्यालयले यस वर्षको वार्षिकोत्सवलाई फरक ढंगले आयोजना गरेको हो।
आइतबार सम्पन्न कार्यक्रममा झण्डै सात सय विद्यार्थीले नृत्य, गीत, कविता, समसामयिक विषयमा तर्क प्रस्तुति, स्काउट गतिविधि तथा नाटकमार्फत आफ्नो प्रतिभा प्रदर्शन गरेका थिए। विद्यार्थीहरूले प्रस्तुत गरेका विविध कार्यक्रममार्फत जीवनोपयोगी सीप, व्यक्तिगत विकास, उज्ज्वल भविष्य निर्माण र सभ्य समाज निर्माणको सन्देश दिएका थिए।
कार्यक्रममा विद्यार्थीका आमाहरूले प्रस्तुत गरेको ‘ममी डान्स’ विशेष आकर्षणको केन्द्र बनेको थियो।
विद्यालयका प्रिन्सिपल राम कालाखेतीका अनुसार नर्सरीदेखि कक्षा १० सम्म अध्ययनरत विद्यार्थीलाई कक्षामा सिकेका सैद्धान्तिक ज्ञानसँगै व्यवहारिक तथा जीवनोपयोगी सीप प्रस्तुत गर्ने अवसर अभिभावक दिवसमार्फत प्रदान गर्ने गरिएको छ। उनले वार्षिकोत्सवमा सीमित अतिथि बोलाई लामो भाषण गराउने परम्परालाई परिमार्जन गर्दै विद्यार्थीमै केन्द्रित उत्सवका रूपमा कार्यक्रम सञ्चालन गर्ने गरिएको बताए।
विद्यालय व्यवस्थापन समितिका अध्यक्ष मनु मञ्जिलले विगतमा विभिन्न प्रोजेक्ट वर्कमार्फत प्रदर्शनी आयोजना गरिएको स्मरण गर्दै यस वर्ष कार्यक्रमको मोडल परिवर्तन गरी स्टेज प्रस्तुति केन्द्रित प्रतिभा प्रदर्शन गराइएको जानकारी दिए।
कार्यक्रमको अवसरमा उत्कृष्ट शिक्षण कार्यका लागि उमेश दुलाल, मेघराज तिम्सिना, दिलीप चौधरी र नितु खड्कालाई सम्मान गरिएको थियो।
हाल उक्त विद्यालयमा एक हजार १७८ जना विद्यार्थी अध्ययनरत छन्।