धरान खानेपानी बोर्डको फागुनमा रु १.५२ करोड खर्च, खातामा अझै रु १.७१ करोड मौज्दात

धरान । धरान खानेपानी व्यवस्थापन बोर्डले फागुन महिनामा रु १ करोड ५२ लाख ३७ हजार ७०५ खर्च भएको विवरण सार्वजनिक गरेको छ। आइतबार आयोजित पत्रकार सम्मेलनमार्फत बोर्डले आर्थिक वर्ष २०८२ को फागुन महिनाको आय–व्यय सार्वजनिक गरेको हो।

कार्यवाहक प्रमुख तथा बोर्डका अध्यक्ष अईन्द्र विक्रम बेघाले हरेक महिना आय–व्यय विवरण सार्वजनिक गर्ने प्रतिबद्धताअनुसार यस पटक पनि खर्च विवरण सार्वजनिक गरिएको बताए। उनका अनुसार फागुन महिनामा उल्लेखित रकम खर्च भए पनि बोर्डको खातामा अझै रु १ करोड ७१ लाख १४ हजार ३०९ रुपैयाँ ३० पैसा मौज्दात रहेको छ। उक्त मौज्दात रकमले आगामी योजनाहरू कार्यान्वयन गर्न आर्थिक आधार प्रदान गर्ने उनले जानकारी दिए।

बोर्डका अनुसार खानेपानी व्यवस्थापनका क्रममा कर्मचारी तलबभत्ता, कार्यालय सञ्चालन, मर्मत सम्भार, उपकरण खरिद तथा अन्य प्रशासनिक कार्यमा उल्लेखनीय रकम खर्च भएको छ।
आयतर्फ डिजिटल माध्यमबाट करिब रु ५९ लाख २१ हजार संकलन भएको छ भने काउन्टरमार्फत करिब रु ८९ लाख राजस्व संकलन भएको बोर्डले जनाएको छ।

खर्च विवरणअनुसार विद्युततर्फ रु ३८ लाख ८१ हजार, मर्मत सम्भारतर्फ रु ४७ लाख ५० हजार र कर्मचारी तलबभत्तामा रु ४३ लाख ८० हजार खर्च भएको उल्लेख गरिएको छ।

पानी उत्पादनमा भूमिगत स्रोतको भर
धरानमा खानेपानी आपूर्तिको मुख्य स्रोत भूमिगत पानी रहेको बोर्डले जनाएको छ। धरानवासीका लागि दैनिक करिब ३ करोड लिटरभन्दा बढी पानी आवश्यक पर्ने अनुमान गरिएको छ।

बोर्डका अध्यक्ष बेघाका अनुसार हाल धरानमा दैनिक करिब २ करोड ४३ लाख ५० हजार लिटर पानी उत्पादन भइरहेको छ। यसमध्ये डिप बोरिङलगायत भूमिगत स्रोतबाट करिब १ करोड ८२ लाख लिटर र कोकाहा, सर्दु, खर्दु तथा निशाने खोलाबाट करिब ६१ लाख ५० हजार लिटर पानी संकलन भइरहेको छ।
उनका अनुसार प्रदेश सरकारको सहयोगमा धरान–१७ मा निर्माण गरिएको डिप बोरिङ हाल प्राविधिक समस्याका कारण सञ्चालनमा आउन सकेको छैन। समस्या समाधान गरी उक्त बोरिङलाई छिट्टै सञ्चालनमा ल्याइने जानकारी उनले दिए।