फेसबुकमा महिला पत्रकारको चरित्रहत्या गरेको आरोपमा एक पक्राउ, अन्यको खोजी जारी

धरान : सामाजिक सञ्जाल फेसबुकमार्फत महिला पत्रकारको चरित्रहत्या गरेको आरोपमा प्रहरीले एक जनालाई पक्राउ गरेको छ।

धरान उपमहानगरपालिका–१२ का फुर्वा शेर्पालाई असान्दर्भिक भिडियो सामाजिक सञ्जालमा पोस्ट गरी महिला पत्रकारको चरित्रहत्या गरेको आरोपमा पक्राउ गरिएको इलाका प्रहरी कार्यालय धरानले जनाएको छ।

पीडित पत्रकार महिलाले शेर्पाविरुद्ध किटानी जाहेरी दिएपछि प्रहरीले उनलाई पक्राउ गरेको हो। शेर्पाविरुद्ध विद्युतीय (इलेक्ट्रोनिक) कारोबार ऐन, २०६३ को दफा ४७(१) अन्तर्गत मुद्दा दर्ता भएको प्रहरीले जनाएको छ।

प्रहरीका अनुसार शेर्पाले सामाजिक सञ्जाल फेसबुकमा गलत तरिकाले पोस्ट गर्दै गालीगलौज तथा अपमानजनक टिप्पणी गरी पत्रकारको चरित्रहत्या गर्ने प्रयास गरेका थिए।

घटनामा संलग्न भएको आरोपमा अन्य चार जनाविरुद्ध पनि जाहेरी परेको छ। इलाका प्रहरी कार्यालय धरानका प्रहरी नायव उपरीक्षक भिषणबाबु राईका अनुसार निशा राई, सन्देश खालिङ, अगम राई र पूर्ण तामाङलगायतको खोजी कार्य भइरहेको छ।
प्रहरी नायव उपरीक्षक राईले पक्राउ परेका शेर्पालाई म्याद थप गरी मुद्दा चलाउने तयारी भइरहेको र अन्य आरोपितहरूको खोजी कार्य जारी रहेको जानकारी दिएका छन्।

प्रहरीका अनुसार उनीहरूले सामाजिक सञ्जालमार्फत महिला पत्रकारको चरित्रहत्या हुनेगरी भिडियो पोस्ट गरेका थिए।