आर्थिक

विदेश फर्केका युवा जाडोमा मजदुर, गर्मीमा उखु व्यापारी मासिक रु ९० हजारसम्म आम्दानी

BTV Nepal

बुधबार, वैशाख १०, २०८२

विदेश फर्केका युवा जाडोमा मजदुर, गर्मीमा उखु व्यापारी मासिक रु ९० हजारसम्म आम्दानी

धरान :विदेशमा सुरक्षागार्डको रूपमा पसिना बगाएका सरोज गौतम र दीपक श्रेष्ठ अहिले उखुको जुस बेचेर आत्मनिर्भर जीवन बिताइरहेका छन्।

गर्मीको चर्को मौसम सुरु भएसँगै इटहरी र धरानका गल्ली–गल्लीमा ताजागरम उखुको जुस बेच्ने स्टलहरूको चहलपहल बढेको छ। ती स्टलहरूमा काम गरिरहेका व्यवसायीमध्ये धेरैजसो विदेशी अनुभव बोकेर फर्किएका युवा छन्, जसले अब देशमै परिश्रमको फल पाइरहेका छन्।

इटहरी उपमहानगरपालिका–६ का सरोज गौतम मलेसियामा सात वर्ष सुरक्षागार्डको रूपमा काम गरेर फर्किएपछि इटहरीको एक गल्लीमा उखुको जुस बेच्न थालेका थिए। सुरुमा टेम्पो चलाए पनि त्यो व्यवसायमा घाटा भएपछि उनले ७० हजार रुपैयाँमा जुस प्रेस किनेर व्यवसाय सुरु गरे। आज ११ वर्षपछि उनले गर्मी महिनामा महिनैमा ९० हजार रुपैयाँसम्म आम्दानी गरिरहेका छन्। “सबै खर्च कटाएर पनि महिनामा ४० हजार बचत हुन्छ,” गौतम भन्छन्, “छोराछोरीको पढाइदेखि घरखर्च यही पेसाले धानेको छ।”

गौतमले बराहक्षेत्रमा एक बिघा जमिन भाडामा लिएर उखुखेतीसमेत गरिरहेका छन्। अपुग परेमा अन्य किसानसँग खरिद गर्छन्। उनका अनुसार उखुको जुस स्वादका साथसाथै स्वास्थ्यका लागि पनि लाभदायी हुन्छ।

धरान उपमहानगरपालिका–५ का दीपक श्रेष्ठ १० वर्ष कतार र ४ वर्ष इरानमा काम गरेर फर्किएपछि उखुको जुस व्यवसायमा लागेका अर्का उदाहरण हुन्। सुरुमा धेरै संघर्ष व्यहोरेका श्रेष्ठ अहिले धरान, इटहरीलगायतका ठाउँमा सामूहिक रूपमा जुस स्टल सञ्चालन गर्दै आएका छन्। उनीसँग हाल दुई जना सहकर्मी छन् भने स्टलमा काम गर्नका लागि स्थायी कर्मचारी समेत राखिएको छ।

“सुरुमा ग्राहक नै आउँदैनथे, गल्ली–गल्ली गएर जुस चखाएर बेच्नु पर्थ्यो,” श्रेष्ठ भन्छन्, “आज ग्राहकहरू आफैँ फोन गरेर आउँछन्।” श्रेष्ठले झापामा तीन बिघा जमिनमा उखुखेती गरिरहेका छन्, जहाँ दुई जनालाई रोजगारी दिएका छन्। उनी अहिले मासिक ७० हजार रुपैयाँसम्म बचत गर्छन्।

इटहरी–२० का अमिर खड्का भने जाडोमा ज्यालामजदुरी गर्छन् र गर्मीमा जुस व्यवसाय सञ्चालन गर्छन्। माघदेखि भदौसम्मको अवधिमा मासिक ६०–७० हजार आम्दानी हुने खडकाले बताए।

यी व्यवसायीहरूका अनुभवले देखाउँछ—ठूलो लगानी र विदेश जानैपर्ने छैन। सानो तर आत्मनिर्भर व्यवसायबाट पनि सन्तोषजनक आम्दानी र रोजगार सिर्जना सम्भव छ। विशेषतः गर्मीको मौसममा यो व्यवसायले बजारमा स्वास्थ्यप्रद र ताजा विकल्पको माग पूरा गरिरहेको खडकाले बताए।

प्रकाशित मिति: बुधबार, वैशाख १०, २०८२

प्रतिक्रिया दिनुहोस्