कैद भुक्तान गरी छुटेका दुई व्यक्ति पेस्तोल र गोलीसहित पक्राउ

सुनसरी । यसअघि आपराधिक गतिविधिमा संलग्न भई कैद भुक्तान गरिसकेका दुई जनालाई सुनसरी प्रहरीले बुधबार पक्राउ गरेको छ । यसपटक उनीहरूलाई अवैध हातहतियारसहित पक्राउ गरिएको हो ।

जिल्ला प्रहरी कार्यालय सुनसरीका अनुसार, मोरङको विराटनगर महानगरपालिका–१७, रानी बस्तीका ५१ वर्षीय नुर महम्मद र वडा नं ८, अशोक चोकका ३२ वर्षीय इमरान खान भन्ने मो. अहम्मदलाई एक थान पेस्तोल, तीन राउन्ड गोली र एक थान म्यागजिनसहित नियन्त्रणमा लिइएको हो ।

प्रहरीका अनुसार नुर महम्मद २०६४ कात्तिक ८ गते जिल्ला प्रहरी कार्यालय मोरङबाट हातहतियार तथा खरखजाना र जबरजस्ती करणी उद्योगमा मुद्दा दर्ता भई १२ वर्ष कैद सजाय भुक्तान गरेर छुटेका थिए । उनका साथी इमरान खान भन्ने मोहमद अहम्मदविरुद्ध २०७५ चैत १९ गते जिल्ला प्रहरी कार्यालय मोरङबाट चोरीको मुद्दा चलेको प्रारम्भिक अनुसन्धानबाट खुलेको छ ।

उनीहरूलाई सुनसरीको चाँदबेला अस्थायी प्रहरी चौकीबाट खटिएको टोलीले गए राति १:२० बजे सुनसरीको गढी गाउँपालिका–१, मधेलीस्थित झण्डाचोकमा पैदल हिँडिरहेको अवस्थामा पक्राउ गरेको हो ।

उनीहरूको शरीर खानतलासी गर्दा एक थान चाइनिज पेस्तोल, सोही पेस्तोलमा लाग्ने म्यागजिन एक थान र ३ राउन्ड गोली बरामद गरिएको प्रहरीले जनाएको छ । दुवै जनालाई दुहबी नगरपालिकास्थित इलाका प्रहरी कार्यालयको हिरासतमा राखी थप अनुसन्धान भइरहेको छ ।