सगरमाथा आरोही प्रीति धरानमा सम्मानित, सुनाइन् शिखर आरोहणका अनुभव

सुनसरी । धरान उपमहानगरपालिकाले आइतबार विश्वको सर्वोच्च शिखर सगरमाथाको सफल आरोही प्रीति रातेरिया अग्रवाललाई सम्मान गरेको छ।

तीनकुने प्रवेशद्वारबाट नगर परिक्रमा गराउँदै प्रीतिलाई धरान उपमहानगरपालिकामा ल्याएर सम्मान गरिएको हो। कार्यवाहक प्रमुख अइन्द्रविक्रम बेघाले धरानकी चेली तथा सगरमाथा आरोहण गर्ने पहिलो मारवाडी महिला बनेकोमा उनलाई बधाई दिएका थिए।

पर्वतारोहणसँगै कला, मनोविज्ञान तथा वैकल्पिक उपचारको क्षेत्रमा उनले पुर्‍याएको बहुआयामिक योगदान युवा पुस्ताका लागि प्रेरणादायी रहेको कार्यवाहक प्रमुख बेघाले बताए। उनले भने, ‘साहसी प्रीतिलाई यो सम्मान समग्र धरानवासीले गौरवका साथ प्रदान गरेका हुन्।’

प्रीतिले गत जेठ ७ गते बिहान ५:५७ बजे विश्वको सर्वोच्च शिखर सगरमाथामा सफल आरोहण गरेकी थिइन्। बेस क्याम्पबाट शिखरसम्म पुग्न उनलाई १२ घण्टा लागेको थियो। सम्मान ग्रहण गर्दै उनले भनिन्, ‘धरान उपमहानगरपालिकाबाट पाएको सम्मानले मलाई अत्यन्तै खुसी बनाएको छ। यो क्षणको मैले कल्पना समेत गरेकी थिइनँ। धरान र धरानवासीले गरेको यो सम्मान कहिल्यै बिर्सने छैन।’

४९ वर्षीया प्रीतिले शिखरबाट ओर्लिन भने २४ घण्टा लागेको बताइन्। धरानमा जन्मिएकी तथा काठमाडौं र मुम्बईमा हुर्केकी उनी विद्यालय जीवनदेखि नै एथलेटिक्स र दौडमा सक्रिय थिइन्। मुम्बईको एक कलेजबाट आर्ट एन्ड डिजाइनमा स्नातक गरेपछि उनले साहसिक पर्वतारोहण यात्रालाई अघि बढाएकी हुन्।

द समिट फोर्स प्रा.लि.को व्यवस्थापन तथा क्लाइम्बिङ गाइड पासाङ शेर्पा र निमा थिन्थक शेर्पाको साथमा सगरमाथा आरोहण गरेको उनले बताइन्। शिखर आरोहणको अनुभव सुनाउँदै उनले भनिन्, ‘सगरमाथाको शिखरमा पुगेपछि करिब आधा घण्टासम्म चारैतिर नियालें। अर्कै संसारमा पुगेको अनुभव भयो। जीवनमा कहिल्यै अनुभूति नगरेको आनन्द महसुस गरें। मैले प्रकृतिबाट हिलिङ प्राप्त गरेको अनुभूति गरें। मानसिक, शारीरिक र आध्यात्मिक रूपमा नयाँ ऊर्जा प्राप्त गरेको अनुभव भयो।’

सगरमाथा आरोहणअघि उनले सन् २०१२ मा अन्नपूर्ण बेस क्याम्प र सन् २०१३ मा एभरेस्ट बेस क्याम्प ट्रेक गरेकी थिइन्। त्यसपछि पहिलो पटक सगरमाथा क्षेत्रकै ६ हजार ४७६ मिटर अग्लो मेरा पिक आरोहण गर्ने प्रयास गरे पनि सफल हुन नसकेको उनले बताइन्।

उनले भनिन्, ‘त्यसबेला म असफल भएँ। त्यसपछि जिम प्रशिक्षण, दौड र शक्ति अभिवृद्धिका अभ्यासलाई निरन्तरता दिएँ। मे २०२४ मा ६ हजार ११९ मिटर अग्लो लोबुचे पूर्वको शिखर आरोहण गरेँ।’

ट्रेकिङ पिकका रूपमा चिनिने लोबुचे पूर्वको शिखर आरोहणपछि आत्मबल र आत्मविश्वास बढेको तथा त्यसपछि तान्जानियाको ५ हजार ८१५ मिटर अग्लो किलिमान्जारो हिमाल पनि सहज रूपमा आरोहण गरेको उनले बताइन्।
उनले भनिन्, ‘अन्ततः सन् २०२५ सेप्टेम्बर २३ मा ८ हजार १६३ मिटर अग्लो मनास्लु हिमाल आरोहण गरेपछि मेरो आत्मविश्वास अझ बढ्यो। त्यसपछि विश्वको सर्वोच्च शिखर सगरमाथा आरोहण गर्न सफल भएँ।’

आफ्नो पर्वतारोहण यात्रा सफल बनाउन आमा निर्मला अग्रवाल र बुबा कमलेशकुमार रातेरिया (अग्रवाल) को महत्त्वपूर्ण भूमिका रहेको उनले स्मरण गरिन्। उनले भनिन्, ‘हिमाल चढ्न मेरा अभिभावकले निरन्तर हौसला र प्रेरणा नदिनुभएको भए म पक्कै सफल हुने थिइनँ।’