चन्द्रमैन धमिथानमा श्रद्धा, संस्कृति र सहभागिताको संगम

धरानः  बराहक्षेत्र नगरपालिका–५ स्थित कालाबंजरको चन्द्रमैन धमिथान धार्मिक स्थलमा यस वर्षको सिरुवा मेला श्रद्धा, आस्था र सांस्कृतिक रौनकका साथ सम्पन्न भएको छ। 

मेलामा आसपासका पालिकाहरूबाट आएका हजारौं भक्तजनहरूको उल्लेख्य सहभागिता देखिएको थियो।

सिरुवा मेलामा आउने भक्तजनहरूले धामी–झाँक्रीमार्फत पूजा–आराधना, भाकल पूजा, तथा पशु र पंक्षी बलिदान जस्ता परम्परागत अनुष्ठान लिएर आउने गरेको स्थानिय बताउॅछन्।

उनीहरू विश्वास गर्छन् कि यहाँ गरिएको पूजा–अर्चनाले मनोकामना पूर्ण हुन्छ र रोग–व्याधिबाट मुक्ति पाइन्छ भन्ने मूल उदेश्य बोकेर एउटै भक्तजन पटक-पटक आउने गर्दछन्।

स्थानीय बासिन्दा र पूजारीहरूका अनुसार, धमिथानमा रहेको शक्ति चमत्कारी मानिन्छ। वर्षौंदेखि भाकल राख्ने, संकल्प गर्ने र पूर्ति भएपछि बलि चढाउने धार्मिक संस्कृति ज्यूँका त्यूँ जोगिएको छ।

मेलाको व्यवस्थापनमा स्थानीय युवा समूहहरू अग्रसर बनेका छन्। मेलाको आकर्षण बढाउन धार्मिक क्रियाकलापसँगै झुला, पिङ, तथा स्थानीय खानाका परिकारहरूको स्टल पनि राखिएको थियो, जसले सांस्कृतिक उत्सवलाई आर्थिक गतिशीलतासँग पनि जोडेको देखिन्छ।

सुरक्षाको पक्षमा भने स्थानीय प्रशासन, प्रहरी र स्वयंसेवकहरूको समेत सक्रिय सहभागिता रहेको थियो।