धरान भानुचोकमा खुल्ला साकेला नाच, बालकदेखि बृद्धसम्मको उत्साहजनक सहभागिता

संजिता धमला 

धरानः किरात समुदायको मौलिक चाड उभौलि पर्वको  अवसरमा किरात राई यायोख्या धरानले भानुचोकमा यस वर्ष विशेष रूपमा खुल्ला साकेला नाच आयोजना गरेको छ। 

साकेला कार्यक्रममा बालबालिका, युवा, महिला,बृद्ध–बृद्धाको  र गैर किरॅातिहरिको समेत बाक्लो उपस्थितउल्लेख्य सहभागिता देखिएको छ, जसले यो सांस्कृतिक पहिचानप्रतिको आकर्षण अझ बलियो हुँदै गएको पुष्टि गरेको छ।

साकेला नाच किरात समुदायको प्रमुख धार्मिक तथा सांस्कृतिक नृत्य हो, जुन उभौली र उधौली पर्वमा नाचिन्छ। यो नाचले प्रकृति प्रतिको श्रद्धा, कृषि संस्कृतिको सम्मान, र सामाजिक एकता झल्काउँछ। साकेला नाच सामूहिक रूपमा घेरो बनाई, मौलिक बाजाको तालमा, प्राकृतिक चालहरू झल्काउने रूपमा नाचिन्छ।

यस वर्षको साकेला नाच विशेष थियो, किनभने धरानको मुख्य चोकमै खुला रूपमा आयोजना गरिएको नाचले स्थानीय नागरिकसहित अन्य समुदायका व्यक्तिहरूलाई र पर्यटकलाई पनि आकर्षित गर्‍यो। युवापुस्ता विशेष रूपमा साकेला नाचप्रति आकर्षित देखिए, उनीहरूले परम्परागत भेषमा सजिएर पूर्ण उत्साहका साथ सहभागिता जनाएका थिए।

किरात राई यायोख्याका सुनसरिका अध्यक्ष राजेन्द्र राईका अनुसार, यो नाच सिर्जनात्मक तरिकाले पहिचान जोगाउने प्रयास मात्र होइन, नयाँ पुस्तालाई आफ्नो संस्कृतिप्रति नजिक ल्याउने अभियान पनि हो।

“हाम्रा बालबालिकादेखि बृद्धसम्मको उत्साहले हामीलाई अझ प्रेरित बनाएको छ,” यायोख्याका अध्यक्षले बताए। “हामी संस्कृति संरक्षणसँगै सहरका बासिन्दामा साकेलाप्रतिको चेतना फैलाउने लक्ष्यसहित यस्तो आयोजनामा जुटेका हौं।”

यस वर्षको साकेला नाचले धरानको सांस्कृतिक वातावरणमा जीवन्तता थपेको छ। विशेषगरी युवाहरूको सहभागिता देख्दा किरात संस्कृतिको भविष्य अझ उज्यालो देखिएको छ।