धरानको लोकमार्गमा बसको टायर पड्किँदा घाइते, अस्पतालमा उपचाररत

धरान, फागुन २५ गते धरान -८ डम्पिङ साइटस्थित कोशी लोकमार्गमा गाडिको टायर पड्किदा दुर्घटना भएको छ।

विराटनगरबाट धरानतर्फ जाँदै गरेको को१ख ६२९२ नम्बरको यात्रु बाहक बसको पछाडिपट्टिको दाहिने साइडका दुई वटा टायर अचानक पड्किएको प्रहरीले जनाएको छ।

टायर पड्किएपछि, बसमा सवार खोटाङ ट्याम्बा गाउँपालिका–७ का २२ वर्षीय लोकेन्द्र घिमिरेले बसबाट हाम फाल्दा अनुहारमा गम्भीर चोट लागेर घाइते भएका छन्। घिमिरे हाल सुनसरी, धरान–१४ स्थित पिण्डेश्वरी विद्यापीठका विद्यार्थी हुन्।

घाइते घिमिरेलाई तत्काल धरानको घोपामा उपचारका लागि लगिएको छ। उनको अवस्था सुधारात्मक रहेको चिकित्सकहरूले जानकारी दिएका छन्।

बसका अन्य यात्रुहरू भने सकुशल रहेको जनाइएको छ। प्रहरीले घटनाबारे थप अनुसन्धान गरिरहेको छ भने बसका चालकलाई सोधपुछका लागि नियन्त्रणमा लिइएको छ।

यातायातमा देखिएका यस्ता समस्याहरूले यात्रुको सुरक्षामा खलल पुर्याउन सक्ने भन्दै स्थानीयले चिन्ता व्यक्त गरेका छन्।