लम्कीचुहाको नहरमा हाम फालेका व्यक्ति सकुशल उद्धार

कैलाली — कैलाली जिल्लाको लम्कीचुहा नगरपालिका–३ मा रहेको रानी जमरा कुलरिया सिँचाइ आयोजनाको नहरमा एक जना बेवारिसे व्यक्ति हाम फालेका छन्।

बिहीवार साझ  उक्त व्यक्तिले नहरमा हाम फालेपछि करिब दुईदेखि तीन किलोमिटरको दूरीमा पुगेर उनलाई सकुशल उद्धार गरिएको हो। उद्धार कार्यमा भजनीका जालपा मिडियाका संवाददाता क्षितिज जैसी र दैलेख खबरका संवाददाता कमल प्याकुरेलको पहलमा मानवसेवा लम्किको संयुक्त टोलीको सक्रियता रहेको थियो।

उद्धारपछि इलाका प्रहरी कार्यालय चिसापानी तथा लम्कीचुहा नगरपालिका प्रमुख सुशीला शाहीको समन्वयमा लम्कीचुहा अस्पतालको एम्बुलेन्समार्फत उपचारका लागि अस्पताल लगिएको थियो। प्रारम्भिक उपचारपछि ती व्यक्तिलाई मानवसेवा लम्कीमा राखिएको छ।

स्थानीयवासीहरूले भने यस नहरमा यसअघि पनि विभिन्न व्यक्ति नुहाउने क्रममा दुर्घटनामा परेका घटनाहरू हुँदै आएको बताए। तर सम्बन्धित निकायहरूको ध्यान त्यहाँ नपुगेको भन्दै गुनासो गर्दै आएका छन्।

यस घटनाले रानी जमरा कुलरिया सिँचाई आयोजनाको नहरमा सुरक्षा व्यवस्थाको आवश्यकता झनै बढेको देखिएको छ।