धरानमा मेयर र उपमेयरबीचको तकरार चुलिँदै, नगर परिसरमा तनाव ग्रस्त,

धरान उपमहानगरपालिकामा नगर प्रमुख हर्क साम्पाङ र उपप्रमुख अइन्द्रविक्रम बेघाबीचको विवाद चुलिँदै जाँदा नगर परिसरमा तनाव झनै बढेको छ। श्रमदानको नाममा नगरको साधन स्रोतको प्रयोग र त्यससँग सम्बन्धित भुक्तानी प्रकरणलाई लिएर शुरु भएको विवादले प्रशासनिक वातावरणलाई अस्थिर बनाएको छ।
हिजो सोमबार सुरु भएको विवाद आज मंगलबार पनि थप जटिल बन्दै गएको छ।
मेयर साम्पाङका समर्थकहरूले हिजो उपप्रमुख बेघालाई हातपात गर्ने प्रयास गरेका थिए भने आज उनीहरूको अर्को समूहले उपप्रमुखको कार्यकक्ष नै घेराउ गर्दै चर्को नाराबाजी गरेको थियो। बिहान डोजर, स्काभेटर र टिपरको चाबी माग्दै उपप्रमुखको कार्यकक्षमा प्रवेश गरेका थिए ।
उपप्रमुख बेघाको पक्षमा रहेका नेकपा माओवादी केन्द्रका कार्यकर्ताहरू पनि त्यसक्रममा उत्रिएपछि स्थिति झनै जटिल बन्यो। दुई पक्षबीच वादविवाद तीव्र हुँदै झगडासम्म पुग्न लाग्दा सशस्त्र प्रहरी बल र इलाका प्रहरी कार्यालय धरानका सुरक्षाकर्मीहरूले हस्तक्षेप गरी सम्भावित भिडन्त टारेका थिए।
विवादको मूल जड श्रमदानका नाममा नगरपालिकाको भारी उपकरण जेसिबी, स्काभेटर, डोजर, टिपर प्रयोगमा रहेको देखिएको छ। यस्ता उपकरण श्रमदान अन्तर्गत प्रयोग गरिए पनि पछि श्रमदान भन्दै गरिएको कामको  भुक्तानी मागिन थालेपछि अहिले गम्भीर प्रश्न उठेको छ ! श्रमदान निःशुल्क हो भने भुक्तानीको माग किन?जस्ता प्रश्न चर्को उठ्न थालेको छ !
उपप्रमुख बेघाले भने, आज बिहान "धरान–१० नारायणपथमा स्काभेटर चलाउने भनेर  मेयरका केही समर्थक  चाबी लिन आएका थिए। जब मैले चाबी ‘मेयर साब’सँग पनि छ भने, उनीहरू आक्रोशित भए। मैले ती चाबीहरू आफूले नियन्त्रणमा राख्नुको कारण नियम विपरीत प्रयोग रोक्नु हो।
उनका अनुसार नगरका साधन स्रोतहरूको दुरुपयोग रोक्न आफूले जिम्मेवारीपूर्वक ती चाबीहरू आफ्नो नियन्त्रणमा राखेका हुन्। यता मेयर पक्षधरहरूले भने श्रमदान कार्यक्रम अन्तर्गत काम भइरहेको दाबी गर्दै उपप्रमुखले अनावश्यक अवरोध गरिरहेको आरोप लगाएका छन्।
दुवै पक्ष आ आफ्नो अडानमा कायम रहँदा नगरपालिकाको नियमित कामकाजसमेत प्रभावित भएको छ।