विजयपुर सम्मेलनमा लिम्बुवानको इतिहास र पहिचानमाथि बहस, आठ कार्यपत्र प्रस्तुत हुँदै

विजयपुर । लिम्बुवानको इतिहास, विजयपुर दरबारको संरक्षण, सांस्कृतिक अतिक्रमण र आदिवासी लिम्बूहरूको भूमिसम्बन्धी विषयमा केन्द्रित हुँदै धरानमा दुईदिवसीय विजयपुर सम्मेलन सुरु भएको छ ।

धरान–लाङ्घाली सामुदायिक वनको भवनमा मंगलबारदेखि सुरु भएको सम्मेलनमा याक्थुङ (लिम्बू) बुद्धिजीवी, इतिहासविद्, अनुसन्धाता तथा विभिन्न क्षेत्रका व्यक्तिहरूले आठवटा कार्यपत्र प्रस्तुत गर्ने कार्यक्रम छ ।

सम्मेलनको पहिलो दिन विजयपुर दरबार परिसरको संरक्षण, विजयपुरकी महारानी थाङ्सामाको ऐतिहासिक भूमिका, दरबार परिसरमाथिको सांस्कृतिक अतिक्रमण तथा फेदाप–मोरङदेखि विजयपुरसम्मको ऐतिहासिक विकासक्रमबारे चारवटा कार्यपत्र प्रस्तुत भए ।

सङ्घर्ष समितिका प्रवक्ता अमित थेबेले ‘विजयपुर दरबार परिसरको संरक्षणका लागि सङ्घर्ष र भावी योजना’ शीर्षकमा कार्यपत्र प्रस्तुत गरे । लेक्चरर ताजुब लिम्बूले ‘मोरङ विजयपुरकी महारानी थाङ्सामा : ऐतिहासिक परिचय, राजनीतिक भूमिका र सामाजिक योगदान’ शीर्षकमा कार्यपत्र प्रस्तुत गरे ।

त्यस्तै, डा. रमेश इजमले ‘सांस्कृतिक अतिक्रमणमा लिम्बुवानको विजयपुर दरबार परिसर : ऐतिहासिक पहिचान र स्वामित्वमाथि चुनौती’ तथा डा. कमल तिगेलाले ‘फेदाप–मोरङदेखि विजयपुरसम्मको ऐतिहासिक विकासक्रम’ शीर्षकमा कार्यपत्र प्रस्तुत गरेका थिए ।

सम्मेलनको दोस्रो दिन पूर्व प्रशासक एवम् मदन पुरस्कार विजेता भगिराज इङ्नामले ‘फेदाप–विजयपुरका अन्तिम राजा बुद्धिकर्ण (लिम्बू) र लिम्बुवान’ शीर्षकमा कार्यपत्र प्रस्तुत गर्नेछन् । उक्त सत्रको अध्यक्षता उपप्राध्यापक हर्क इजमले गर्नेछन् भने वरिष्ठ साहित्यकार बम देवानले टिप्पणी गर्नेछन् ।

अनुसन्धाता भीमा खजुमले ‘चौबिस मिक्लुक थुम र विजयपुर’ शीर्षकमा कार्यपत्र प्रस्तुत गर्नेछिन् । उक्त कार्यपत्रमाथि लीला तुम्साले टिप्पणी गर्नेछिन् भने डा. योगेन्द्र पालुङ्वाले सत्रको अध्यक्षता गर्नेछन् ।

त्यसैगरी, आदिवासी अभियन्ता नन्द कन्दङ्वाले ‘आदिवासी लिम्बूहरूको भूमिभित्र विजयपुर’ शीर्षकमा कार्यपत्र प्रस्तुत गर्नेछन् । उक्त कार्यपत्रमाथि वरिष्ठ पत्रकार भवानी बरालले टिप्पणी गर्नेछन् ।

अन्तिम कार्यपत्रका रूपमा प्राज्ञ दिलेन्द्र कुरुम्वाङले ‘लिम्बुवानको ऐतिहासिक तहसिल राजधानी विजयपुर’ शीर्षकमा प्रस्तुति दिनेछन् । उक्त कार्यपत्रमाथि नन्द कन्दङ्वाले टिप्पणी गर्नेछन् ।

सम्मेलनमा प्रस्तुत कार्यपत्र, छलफल र विमर्शका आधारमा विजयपुर घोषणापत्र जारी गरिने आयोजकले जनाएको छ ।

सम्मेलनले विजयपुर दरबार परिसरबारे याक्थुङ समुदायको साझा अवधारणा निर्माण गर्न सहयोग पुग्ने आयाेजक विजयपुर दरबार परिसर संरक्षण सङ्घर्ष समितिका अध्यक्ष तीर्थ मादेम्बाले जनाए । सम्मेलनकाे समापनमा लेखक भगीराज इङ्नामलाई सम्मान गरिने कार्यक्रम समेत रहेको सचिव सन्ताेष कुरुम्वाङले बताए ।

पूर्व प्रदेश प्रमुख प्रा. डा. गोविन्द तुम्बाहाङको प्रमुख आतिथ्यमा सुरु भएको सम्मेलनको उद्घाटन सत्रमा पूर्वमन्त्री एवम् जनता समाजवादी पार्टी नेपालका वरिष्ठ नेता रकम चेम्जोङ, सङ्घीय लोकतान्त्रिक राष्ट्रिय मञ्चका अध्यक्ष कुमार लिङ्देन, नेपाल जनमुक्ति पार्टीका अध्यक्ष केपी पालुङ्वा, उज्यालो नेपाल पार्टीका केन्द्रीय सदस्य जेन्टल लाओतीलगायतले सम्बोधन गरेका थिए ।