धरान सबस्टेशन निर्माणका लागि नेपाल विद्युत् प्राधिकरणद्वारा टेण्डर आह्वान

धरान । धरानस्थित २२० केभी जीआईएस, ३३/११ केभी सबस्टेशन (सर्दु सबस्टेशन) निर्माणका लागि नेपाल विद्युत् प्राधिकरणले टेण्डर आह्वान गरेको छ । 

प्राधिकरणको प्रसारण निर्देशनालयअन्तर्गत उच्च भोल्टेज ग्रिड विकास विभागले सोमबार बोलपत्र आह्वान गरेको हो ।

आह्वान गरिएको टेण्डरमा धरान २२० केभी जीआईएस, ३३/११ केभी सबस्टेशनको डिजाइन, आपूर्ति, जडान, परीक्षण तथा सञ्चालनमा ल्याउने काम समेटिएको छ । यससँगै संखुवासभाको बानेश्वर सबस्टेशनको क्षमता वृद्धि गर्ने कामसमेत ठेक्कामा समावेश छ ।

अन्तर्राष्ट्रिय प्रतिस्पर्धात्मक बोलपत्रअन्तर्गत ‘सिंगल स्टेज–टु इनभेलप’ प्रक्रियाबाट ठेक्का अघि बढाइने प्राधिकरणले जनाएको छ । काम सम्पन्न गर्न सम्झौता प्रभावकारी भएको मितिले २१ महिना अवधि तोकिएको छ ।

टेण्डरमा सहभागी हुन इच्छुक कम्पनीले पछिल्ला १० वर्षमध्ये उत्कृष्ट तीन वर्षको औसत वार्षिक निर्माण कारोबार कम्तीमा २ अर्ब १५ करोड रुपैयाँ बराबर भएको प्रमाण पेश गर्नुपर्नेछ । त्यस्तै, समान प्रकृतिको कम्तीमा एउटा १ अर्ब ५५ करोड रुपैयाँ बराबरको काम सम्पन्न गरेको अनुभव हुनुपर्नेछ ।

बोलपत्र दस्तुर २० हजार रुपैयाँ तोकिएको छ । इच्छुक कम्पनीले २०८३ कात्तिक १९ गतेसम्म बोलपत्रसम्बन्धी कागजात खरिद गर्न सक्नेछन् । बोलपत्र कात्तिक २० गते दिउँसो १२ बजेसम्म पेश गर्नुपर्नेछ ।

प्राधिकरणले सोही दिन दिउँसो १२ः३० बजे प्राविधिक बोलपत्र खोल्ने जनाएको छ । बोलपत्रसँग कम्तीमा ६ करोड ४० लाख रुपैयाँ बराबरको बोलपत्र जमानत पेश गर्नुपर्नेछ । प्रि–बिड बैठक भने २०८३ असोज ३० गते बिहान ११ बजे आयोजना हुने जनाइएको छ ।