धरानको देशीलाइनमा दुई तर्फी सवारी आवागमनको माग गर्दै व्यवसायी आन्दोलित, प्रहरीले बलपूर्वक हटायो ढाट

धरान । धरानको देशीलाइनमा दुईतर्फी सवारी आवागमन (टु वे) को माग गर्दै व्यावसायीले सडक अवरुद्ध गरेका छन् । त्रिपाल टाँगेर उनीहरूले सडकमै धर्ना दिएका छन् । 

व्यवसायी आन्दोलित भएपछि प्रहरी प्रशासन परिचालन गरिएको छ । व्यवसायीले  माछाभौडीमा गरेको अवरोध (बाँसको ढाट) हटाइएको छ । व्यवसायीले भने सडकमै नाराबाजी गरेका छन् ।

व्यवसायीले स्थानीय सरकारले अभिभावकीय भूमिका नखेलेको आरोप लगाउँदै आएका छन् । चिनियाँ चोक र भानुचोकमा समेत सडक अवरुद्ध गर्ने व्यवसायीका प्रतिनिधि भूपाल चाम्लिङ राईले चेतावनी दिए । 

उनले खुल्ला रुपमा चुनौती दिएको केही समयपछि नेपाल प्रहरी र सशस्त्र प्रहरी बलको टोलीले देशीलाइनमा लगाएको ढाट बलपूर्वक हटाएको थियो । 

एकतर्फी सवारी आवागमनका कारण व्यापार-व्यवसाय चौपट भएको भन्दै व्यवसायी आन्दोलित भएका हुन् । भानुचोकबाट बसपार्क सरिसकेपछि एकतर्फी आवागनको औचित्य नरहेको व्यवसायीको भनाइ छ । 

व्यवसायीले धरान  सरकारका प्रतिनिधिले वार्ता गरी समस्या समाधान गर्नुपर्ने मागसमेत राखेका छन् । यता कार्यवहाक नगरप्रमुखले व्यवसायी वार्तामा नआएको सञ्चारमाध्यमलाई प्रतिक्रिया दिएका छन् । 

धरानका निवर्तमान नगर प्रमुख हर्कराज राईको नेतृत्वमा धरानमा एकतर्फी सवारी आवागमन लागू भएको थियो । २०७९ फागुन ८ गतेको धरान कार्यपालिका बैठकले एकतर्फी आवागमन गर्ने निर्णय भएको थियो ।