इटहरीमा ‘इटहरी बालकला साहित्य महोत्सव–२०८२’ फागुन १ र २ गते आयोजना हुँदै

धरान । बालबालिकामा साहित्यप्रतिको अभिरुचि अभिवृद्धि गर्दै पठन संस्कृतिको विकास गर्ने उद्देश्यले इटहरीमा ‘इटहरी बालकला साहित्य महोत्सव–२०८२’ आयोजना हुने भएको छ।

पाथिभरा माध्यमिक विद्यालय, इटहरीको आयोजनामा आगामी फागुन १ र २ गते महोत्सव सञ्चालन हुने भएको हो। आयोजकले आज पत्रकार सम्मेलनको आयोजना गरी महोत्सवबारे जानकारी गराएको छ।

महोत्सवका कार्यक्रम संयोजक विक्रम कुमार घिमिरेका अनुसार महोत्सवमा वरिष्ठ कलाकार मदनकृष्ण श्रेष्ठ र हरिवंश आचार्यको प्रमुख आतिथ्यता रहनेछ। महोत्सवमा राष्ट्रिय स्तरमा ख्यातिप्राप्त बालसाहित्य सर्जकहरूका साथै स्थानीय साहित्यकार, कवि, अभिभावक, शिक्षक तथा विद्यार्थीहरूको उल्लेखनीय सहभागिता रहनेछ।

महोत्सवमा करिब सात हजार जनाको सहभागिता रहने अनुमान गरिएको आयोजकले जनाएको छ। कार्यक्रममा शिक्षक, कलाकार तथा साहित्यकारहरूबाट कला–साहित्यका विभिन्न विधामा आधारित कार्यशालाहरू सञ्चालन गरिने विद्यालयले जानकारी दिएको छ।

इटहरी उपमहानगरपालिकाको अभिभावकत्वमा आयोजना हुने महोत्सव बुकल्याण्ड काठमाडौंको सह–आयोजनामा सञ्चालन हुनेछ। साथै काव्य–डबली, प्याब्सन कोशी प्रदेश, नगर प्याब्सन इटहरी, हिसान सुनसरी, संगीत साधना प्रतिष्ठान इटहरी, कारखाना, वेदा, प्ले नेपाल र नाइस संस्थाहरूको साझेदारी तथा सहकार्य रहने जनाइएको छ।

महोत्सव पाथिभरा माध्यमिक विद्यालय परिसरमा बिहान ९ बजेदेखि दिउँसो ३ः३० बजेसम्म सञ्चालन हुनेछ।