‘स्वर्णिम साहित्य पुरस्कार' कवि शरणकुमार राईलाई, सम्मान रेखा सुबेदीलाई

वराहक्षेत्र । यस वर्षको स्वर्णिम साहित्य सम्मान धरान-१८ निवासी साहित्यकार कवि शरणकुमार राईलाई अर्पण गरिने भएको छ । त्यसैगरी, स्वर्णिम साहित्य पुरस्कारबाट वराहक्षेत्र-७ (हाल बेलबारी निवासी) कवि रेखा सुवेदीलाई पुरस्कृत गरिने निर्णय भएको छ ।

वराहक्षेत्र नगरपालिका-३ स्थित स्वर्णिम साहित्य समाजको २०औँ स्थापना दिवसको अवसरमा ‘स्वर्णिम साहित्य पुरस्कार तथा सम्मान कार्यक्रम-२०८३’ आयोजना गर्न लागिएको हो । संस्थाको कार्यसमितिले गत वैशाख ६ गते गरेको निर्णयअनुसार विगतका वर्षहरूमा झैँ यस वर्ष पनि साहित्यकारहरूलाई पुरस्कृत र सम्मानित गर्न लागिएको हो ।

सुप्रसिद्ध कवि श्रवण मुकारुङको प्रमुख आतिथ्यतामा सञ्चालन हुने उक्त कार्यक्रम आगामी जेठ २६ गते शनिबारका दिन आयोजना हुने स्वर्णिम साहित्य पुरस्कार तथा सम्मान समितिका प्रमुख प्रकाश दिप्साली राईले जानकारी दिए ।

वराहक्षेत्र-३ नडाहास्थित एक होटलको सभाहलमा बिहान ११:०० बजेबाट सुरु हुने सो कार्यक्रममा विभिन्न व्यक्तित्वहरूलाई अतिथिका रूपमा निमन्त्रणा गरिएको छ ।