‘काव्य–कला कोलाज–२०८३’ मा तस्बिर, विचार र भावनाको विमर्श

धरान ।  धरानमा शब्द, विचार, भावना र कलाको सुन्दर मिलनका रूपमा रहेको 'काव्य-कला कोलाज-२०८३' मा कविता वाचनसँगै विभिन्न साहित्यिक र बौद्धिक विमर्श भएको छ ।

सिर्जनाप्रेमीहरूले साहित्य, कला, संस्कृति र फोटोग्राफीको अनुपम आस्वाद ग्रहण गरेका छन् । बौद्धिक विमर्शका दुई विशेष सत्रमा ‘कथा धरानको’ विषयमा डा. दीपक न्यौपानेले धरानको ऐतिहासिक र सांस्कृतिक सन्दर्भमा आफ्नो वक्तव्य प्रस्तुत गरे । उनले धरानको कथा साहित्यको ईतिहास र कथाकारहरूको प्रवृत्ति उल्लेख गरे । 

‘हामीले बनाइरहेको मानिस’ शीर्षकमा आयोजित अर्को सत्रमा मनोवैज्ञानिक रुकुम टमटा र सह–प्राध्यापक डा. इन्दिरा मिश्रले मानिसको मनोविज्ञान र समाज निर्माणमा यसको प्रभावका बारेमा गहन विमर्श गरे । उक्त सत्रको सहजीकरण राज माङलाकले गरेका थिए ।

काव्य-कला कोलाजमा ‘इन्द्रेणी कविता’ शीर्षक अन्तर्गत विभिन्न मातृभाषाका सर्जकहरूले आफ्ना रचना वाचन गरे । यो सत्र भाषिक र सांस्कृतिक विविधताले सिँगारिन पुग्यो । पार्श्व सङ्गीतको धुनसँगै 'इन्द्रेणी कविहरू' निमा पोङ्स्युव भोटे, रामनन्द चौधरी, मिश्रा गुरुङ, आइतु ग्याबा, लिला मगर, भीम विरही, वर्षा धिमाल, भवानी शंकर भट्टराई र बाली छथरेले आ–मातृभाषामा कविता प्रस्तुत गरे । 

साहित्यिक प्रस्तुतिसँगै कार्यक्रममा आयोजित विशेष फोटोग्राफी प्रदर्शनीले कार्यक्रमको गरिमा थप बढाएको थियो । प्रदर्शनीमा फोटोग्राफर दीपेश योञ्जनका मञ्चीय क्षणहरू समेटिएका तस्बिरहरू, वरिष्ठ ल्यान्डस्केप फोटोग्राफर राजेश शाक्यका प्रकृति र जीवनका आयाम झल्काउने मनमोहक तस्बिरहरू तथा फोटोग्राफर रोजेश शाक्यका सिर्जनात्मक एवं सौन्दर्यपरक फोटोग्राफी कृतिहरू प्रदर्शन गरिए ।

साहित्य र दृश्य कलाको यस उत्सवमा सहभागी हुन पुगेका कलाप्रेमीहरूले कार्यक्रमले धरानको साहित्यिक र सांस्कृतिक वातावरणलाई थप समृद्ध बनाएको प्रतिक्रिया दिएका थिए । कार्यक्रममा उपस्थित स्रष्टाहरूले शब्दका कविता र कलाका रंगहरूको अनुभूतिसँगै तस्बिरभित्र बोलिरहेका कथाहरूसँग साक्षात्कार गर्ने अवसर पाएको कवि सुदीप पाख्रिनले बताए ।

कृष्ण पाख्रिन स्मृति प्रतिष्ठानको आयोजनामा धरान उपमहानगरको सहयोगमा काव्य-कला कोलाज-२०८३ आयोजना गरिएको सभाध्यक्ष राजेश विद्रोहीले जानकारी दिए ।