चो?लुङ साहित्य गोष्ठीको पहिलो दिन १७ कविका कविता

वसन्तपुर (तेह्रथुम) ।

ए शहर.. किन ?
मेरो वरपीपल चौतारो, 
धर्मशाला, रोधीघर, चुम्लुङ हिम 
भत्काउँदै र बनाउँदैछस् चिल्ला लेन 
र, गुडाउँदैछस् विकार लोड गरिएका ट्याक्टरहरू
र, मेरो अगेनोमा डम्पिङ गर्दैछ्स् 

मेरो गाई बाख्रा चराउने हरेलो डाँडो
मेरो जुनेलो फलाउने पाखो 
तेरो पिकनिक स्पोट भो 
तेरो भ्यू टावर भो 
मेरो छङछङ बग्ने झर्ना खोला 
तेरो हाइड्रोपावर भो 
...
मेरो सिकुवामा तेरो सिंहदरबारको पोस्टर ...
... 
ए शहर तेरो दुश्मनी त मेरो गाउँसँग पो रहेछ हगि?
भो ! ए शहर लैजा तेरो सिंहदरबार 
फर्काई दे मेरो गाउँ ! 

लालीगुँरास नगरपालिकाका नगर प्रमुख कवि/ अध्येता अर्जुन माबोहाङले 'ए शहर लैजा तेरो सिंहदरबार !' शीर्षकको कविता प्रस्तुत गरे । 

माबोहाङले कविता प्रस्तुत गर्नुअघि शनिबार सावायत्हाङको चुम्लुङ (ढुंगो) अघि १७ कविहरूले आफ्ना सिर्जना प्रस्तुत गरे । 

कविहरू सुष्मा दाहाल, विक्रम पौडेल, राजकुमार तरेवा, पूष्पा बोगटी, महेश दोस्ताज, सीता तुम्खेवा, रुमानी कुलुङ, टोलीप्रसाद राजवंशी, सन्ध्या सुब्बा, प्रवेग हाङ्स्रोङ, साङसेन पङ्धाक, गगन योक्पाङ्देन, विराट किराँती, दर्शन घिमिरे, टीका भाइ, नरेश काङमाङ राईले युमा सङ्ग्राहलय, सिरिजङ्गा साप्लाहिम र यवाहिमलाई पृष्ठभूमिमा राखेर कविता प्रस्तुत गरे । 

कवि प्रवेश हाङ्स्रोङले गाउँका अभाव र शहरको सम्झना कवितामा पोखे । 

...हिउँद लागेपछि 
बाउ बाजेहरु 
धरान झर्थे। 
खाली ढाकरमा 
आभावको नाम्लो कसेर !

लेखको बाटो 
डाँडाको ढाँड समात्दै उक्लन्थे 
सातपत्रे जङ्गार... 
र झर्थे 
लाबर बोटेको ओसमा पैताला टाँस्दै 
लेउती खोलामा थकान पखाल्दै

कहिले झर्थे 
ओरालै ओरालो 
तमोरको गढतिरमा हाक्पारे गाउँदै

घर फिर्दा च्याब्रुङ नबजे पनि 
पाइलामा ताल हुन्थ्यो

सिद्राको बासनाले 
गाउँ फेरि जिउँदो हुन्थ्यो । 
कागजको पोकोभित्र 
आमा घर घर पुऱ्याउनुहुन्थ्यो, धरान

लालीगुँरास महोत्सवको तेस्रो दिन आयोजित चो?लुङ साहित्य गोष्ठीको पहिलो दिन कविहरूले आफ्ना रचना प्रस्तुत गरेका हुन् । गोष्ठीको दोस्रो दिन आइतबार मुख्य आकर्षण कवि उपेन्द्र सुब्बा, चन्द्र गुरुङ, राज माङ्लाक, प्रदीप मेन्याङ्बो,  हेमन यात्रीलगायतका दर्जन कविले कविता प्रस्तुत गर्ने गोष्ठीका संयोजक तथा सहजकर्ता अमित थेवेले जानकारी दिए ।