पहिचान पुरस्कार कोषद्वारा २०८३ सालका लागि कृति आह्वान

धरान । 'पहिचान पुरस्कार कोष' ले २०८२ साल वैशाखदेखि चैतसम्म प्रकाशित कृतिहरूलाई पहिचान पुरस्कारका लागि दर्ता गराउन आह्वान गरेको छ ।

बुधबार सूचना जारी गर्दै कोषले २०८३ साल जेठ महिनाभित्र दर्ता गराइसक्नका लागि सर्जक र सम्बन्धितलाई आह्वान गरेको छ । 

कोषका संस्थापक नरेश काङमाङ राईद्वारा जारी सूचनामा २०८१ सालमा कोषमा दर्ता भएका कृतिलाई समेत २०८२ सालमा प्रकाशित भई दर्ता भएका कृतिसँगै उत्कृष्ट कृति छनोट गरी पुरस्कार प्रदान गरिने उल्लेख छ । 

पहिचान पुरस्कार कोषद्वारा स्थापित 'पहिचान पुरस्कार' नेपाली साहित्यमा पहिचानको मुद्दालाई उजागर गर्ने उत्कृष्ट कृतिहरूलाई प्रदान गरिने प्रतिष्ठित पुरस्कार हो । यो पुरस्कारको राशि हाल ५ लाख २ हजार २ रुपैयाँ रहेको छ ।

यसअघि २०८०/८१ सालको पहिचान पुरस्कार राजु स्याङ्तानको कवितासङ्ग्रह ‘ओ पेङ्दोर्जे’ लाई प्रदान गरिएको थियो । 

त्यस्तै २०८१/८२ को पहिचान सम्मान वरिष्ठ साहित्यकार बैरागी काइँलालाई नगद ५ लाख २ हजार २ रुपैयाँ र ताम्रपत्रसहित प्रदान गरिएको थियो ।

पहिचान युवा सम्मान गिलु रातोस (गणेशकुमार राई) लाई नगद ५० हजार २ सय २ रुपैयाँसहित ताम्रपत्रसहित प्रदान गरिएको थियो ।