सुनसरीका चार क्षेत्रमा नयाँ राजनीतिक लहर : तीन क्षेत्रमा रास्वपा अगाडि, क्षेत्र नं. १ मा हर्क राईको अग्रता

धरान । प्रतिनिधिसभा सदस्य निर्वाचनअन्तर्गत सुनसरी जिल्लाका चारवटै निर्वाचन क्षेत्रमा भइरहेको मतगणनाको पछिल्लो परिणामले जिल्लाको राजनीतिक समीकरणमा उल्लेखनीय परिवर्तनको संकेत दिएको छ। हालसम्मको मतपरिणाम अनुसार तीन निर्वाचन क्षेत्रमा राष्ट्रिय स्वतन्त्र पार्टी (रास्वपा) का उम्मेदवारहरूले अग्रता कायम गरेका छन् भने सुनसरी क्षेत्र नं. १ मा हर्क राज राई नेतृत्वको श्रम संस्कृति पार्टी अगाडि देखिएको छ।

सुनसरी क्षेत्र नं. १ मा हर्क राज राई ९ हजार १ सय ३३ मतसहित अग्रस्थानमा हुनुहुन्छ। उहाँका निकटतम प्रतिस्पर्धी गोमा तामाङ (रास्वपा) ले ७ हजार ४ सय ७३ मत प्राप्त गर्नुभएको छ। पुराना दलतर्फ सूर्यबहादुर भट्टराई (नेकपा) ले १ हजार ७ सय ५ मत प्राप्त गर्नुभएको छ भने टिकाराम लिम्बू (नेकपा एमाले) ले १ हजार ४ सय ८९ र सुजेन्द्र तामाङ (नेपाली कांग्रेस) ले १ हजार २ सय ५४ मत प्राप्त गर्नुभएको छ।

सुनसरी क्षेत्र नं. २ मा लाल विक्रम थापा (रास्वपा) १६ हजार २५ मतसहित अग्रस्थानमा हुनुहुन्छ। उहाँलाई राजीव कोइराला (नेपाली कांग्रेस) ले ६ हजार ५ सय ८६ मतसहित पछ्याइरहनुभएको छ।
यस्तै सुनसरी क्षेत्र नं. ३ मा अशोक कुमार चौधरी (रास्वपा) २९ हजार ५ सय ६७ मतका साथ सबैभन्दा ठूलो मतान्तरसहित अग्रस्थानमा हुनुहुन्छ। उहाँका निकटतम प्रतिस्पर्धी विजय कुमार गच्छदार (नेपाली कांग्रेस) ले १० हजार ८ सय ८६ मत प्राप्त गर्नुभएको छ भने भगवती चौधरी (नेकपा एमाले) ले ८ हजार ७ सय ९४ मत ल्याउनुभएको छ।

यसैगरी सुनसरी क्षेत्र नं. ४ मा पनि दीपक कुमार साह (रास्वपा) ५ हजार ६ सय ७८ मतका साथ अग्रस्थानमा हुनुहुन्छ। उहाँलाई ज्ञानेन्द्र बहादुर कार्की (नेपाली कांग्रेस) ले २ हजार ७७ मतसहित पछ्याइरहनुभएको छ।
पछिल्लो मतगणनाले सुनसरीमा परम्परागत राजनीतिक दलहरूभन्दा नयाँ र वैकल्पिक शक्तिप्रति मतदाताको आकर्षण बढ्दै गएको संकेत गरेको छ। विशेषगरी रास्वपाका उम्मेदवारहरूले तीन क्षेत्रमा अग्रता कायम गर्दै जिल्लाको राजनीतिक समीकरण बदलिने सम्भावना देखिएको छ।

त्यस्तै सुनसरी क्षेत्र नं. १ मा हर्क राज राई नेतृत्वको श्रम संस्कृति पार्टीले अग्रता कायम गर्दा स्वतन्त्र तथा नयाँ राजनीतिक धारले पनि मतदाताबाट उल्लेखनीय समर्थन पाइरहेको देखिएको छ।
हाल मतगणना जारी रहेकाले अन्तिम परिणाम आउन बाँकी छ। प्रारम्भिक नतिजाले भने सुनसरीमा नयाँ राजनीतिक लहर देखिएको विश्लेषण हुन थालेको छ।