धरानमा घर तोडफोड र ज्यान मार्ने प्रयासको आरोप, स्थानीय त्रसित

धरान — धरान उपमहानगरपालिका वडा नं. १७ करिडोर मार्गस्थित एक घरमा गएराति अज्ञात समूहद्वारा गरिएको तोडफोड तथा आक्रमणको घटनाले स्थानीय क्षेत्रमा त्रास फैलिएको छ।
घरधनी दीपक राई का अनुसार ठूलो संख्यामा आएका युवाहरूको समूहले घर घेराउ गरी आक्रमण गरेको र परिवारको ज्यान लिनेसम्मको प्रयास गरेको आरोप लगाइएको छ।

राईले बताए अनुसार राति अचानक आएका व्यक्तिहरूले चारैतिरबाट घरमा आक्रमण गर्दै तोडफोड गरेका थिए। “म कसैसँग दुश्मनीमा थिइनँ, किन यस्तो भयो भन्ने थाहा छैन। तर आक्रमण गर्नेहरूको उद्देश्य ज्यानै लिने जस्तो देखिन्छ,” उनले भने।

उनले केही समयदेखि चुनावअघि स्कुटरमा आएका केही व्यक्तिहरूले घर वरिपरि गालीगलोज गर्दै हिँड्ने गरेको उल्लेख गर्दै उक्त गतिविधि र हालको आक्रमणबीच सम्बन्ध हुन सक्ने आशंका व्यक्त गरे पनि ठोस जानकारी नभएको बताए।
घटनापछि राईले नेपाल प्रहरी अन्तर्गतको इलाका प्रहरी कार्यालयमा उजुरी दिने तयारी गरेका छन्। साथै, उनले स्थानीय सरकार र प्रहरी प्रशासनलाई घटनाको निष्पक्ष छानबिन गरी दोषीमाथि कडा कारबाही गर्न आग्रह गरेका छन्।

राईले व्यक्तिगत रिसइबी भए संवादमार्फत समाधान खोज्नुपर्नेमा जोड दिँदै यसरी राति आएर घरपरिवारलाई लक्षित गरी आक्रमण गर्नु अत्यन्तै गम्भीर र निन्दनीय भएको बताए।
प्रहरीका अनुसार घटनाबारे थप अनुसन्धान भइरहेको छ।