धरानमा कुकुरको एक्स–रे प्रकरणबारे स्पष्टीकरण, भ्रामक समाचारप्रति आपत्ति

धरान । Sunsari Polyclinic and Diagnosis Center Pvt. Ltd. ले कुकुरको उपचारसम्बन्धी विषयमा फैलिएको समाचारप्रति गम्भीर ध्यानाकर्षण भएको जनाएको छ।

संस्थाले प्रेस विज्ञप्ति जारी गर्दै हालै विभिन्न सञ्चारमाध्यम तथा सामाजिक सञ्जालमा “कुकुरको उपचार गरिएको” भनी प्रसारित समाचार भ्रामक, तथ्यहीन तथा संस्थाको छवि धुमिल पार्ने उद्देश्यले आएको उल्लेख गरेको छ।

विज्ञप्तिअनुसार, धरान–स्थित उक्त संस्थामा पशु चिकित्सकको अनुरोध तथा एक्स–रे प्राविधिकको उपस्थितिमा कुकुरको एक्स–रे सेवा मात्र प्रदान गरिएको स्पष्ट पारिएको छ। संस्थाले कुकुरको उपचार भने आफूहरूले नगरेको जनाएको छ।
यस्तै, सम्बन्धित समाचार सम्प्रेषणका क्रममा आवश्यक आधिकारिक जानकारी नलिइएको र एकतर्फी रूपमा सामग्री प्रकाशन गरिएको भन्दै संस्थाले आपत्ति जनाएको छ। उक्त विषयमा स्पष्टीकरण लिन कुनै पनि सञ्चारकर्मी सम्पर्कमा नआएको पनि उल्लेख गरिएको छ।

संस्थाले यस्ता भ्रामक तथा प्रतिष्ठामा आँच पुर्‍याउने गतिविधिहरू तत्काल सच्याउन सम्बन्धित पक्षलाई सचेत गराएको छ। अन्यथा, मानहानि तथा गलत सूचना प्रवाहविरुद्ध प्रचलित कानुनअनुसार कडा कारबाही अघि बढाइने चेतावनी दिइएको छ।
अन्त्यमा, संस्थाले सर्वसाधारण तथा सरोकारवालालाई आधिकारिक स्रोतबाट प्राप्त सूचनामा मात्र विश्वास गर्न अनुरोध गरेको छ।