सुनसरीमा ‘लापसे–मापसे’ विरुद्ध ट्राफिकको कडाइ, जोखिमपूर्ण प्रवृत्ति अझै कायमै

धरान, चैत १५ — सुनसरीमा लागूऔषध (लापसे) तथा मादक पदार्थ (मापसे) सेवन गरेर सवारी चलाउने चालकविरुद्ध ट्राफिक प्रहरीले निगरानी र कारबाही तीव्र पारेको छ। तर कडाइका बाबजुद पनि यस्तो जोखिमपूर्ण प्रवृत्ति पूर्ण रूपमा नियन्त्रणमा आउन सकेको छैन।

नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, इटहरीका प्रमुख प्रहरी उपरीक्षक दीपक गिरीका अनुसार विशेष चेकिङ अभियान सञ्चालन गर्दै नशालु पदार्थ सेवन गरेर सवारी चलाउने चालकहरूलाई नियन्त्रणमा लिने कार्य जारी छ। “नशामा सवारी चलाउँदा चालक मात्र होइन, यात्रुको ज्यानसमेत जोखिममा पर्छ,” उनले भने, “सचेतना दिँदा पनि अपेक्षित सुधार देखिएको छैन।”
हालै झापा, मोरङ र सुनसरीका विभिन्न स्थानमा गरिएको चेकिङमा ५० भन्दा बढी चालक कारबाहीमा परिसकेका छन्।

आइतबार धरान उपमहानगरपालिका–८ स्थित तीनकुने क्षेत्रमा गरिएको परीक्षणमा ३२ जना चालकको पिसाब जाँच गर्दा ७ जना नशालु अवस्थामा भेटिएका थिए। तीमध्ये ६ जनाले लागूऔषध र १ जनाले मादक पदार्थ सेवन गरेको पुष्टि भएको प्रहरीले जनाएको छ।
जिल्ला ट्राफिक प्रहरी कार्यालय, सुनसरीका प्रमुख प्रहरी निरीक्षक अनिल माबोहाङका अनुसार पक्राउ परेकामध्ये चार जनाले गाँजा, दुई जनाले अफिम सेवन गरेका थिए भने एक जना मोटरसाइकल चालक मापसे अवस्थामा थिए। उनीहरूलाई आवश्यक कानुनी कारबाहीका लागि इलाका प्रहरी कार्यालय, धरानमा बुझाइएको छ।

प्रहरीका अनुसार पटक–पटक कारबाही गर्दा पनि यस्तो प्रवृत्ति पूर्ण रूपमा रोकिएको छैन। सार्वजनिक सवारीका चालकले नै नशालु पदार्थ सेवन गरेर सवारी चलाउनु गम्भीर लापरबाही भएको एसपी गिरीको भनाइ छ।
स्थानीय चालक खगेन्द्र थापाले ट्राफिकको कडाइ मात्र पर्याप्त नहुने उल्लेख गर्दै जनचेतना अभिवृद्धि, कडा कानुन कार्यान्वयन र नियमित निगरानी आवश्यक रहेको बताए। “सडक सुरक्षा सबैको साझा जिम्मेवारी हो,” उनले भने, “चालक, यात्रु र सरोकारवाला सबै सचेत भए मात्रै दुर्घटना न्यूनीकरण सम्भव हुन्छ।”

पछिल्लो आठ महिनामा कोशी प्रदेशभर ४ हजार २ सय ९ सवारी दुर्घटना हुँदा ३०५ जनाको मृत्यु भएको छ। त्यस्तै ५७५ जना गम्भीर र ६ हजार ४९५ जना सामान्य घाइते भएका प्रहरीको तथ्यांक छ।
ट्राफिक प्रहरीले अब सवारी जाँचलाई अझ सघन बनाउँदै जनचेतना कार्यक्रम र कडाइका साथ नियम कार्यान्वयनलाई निरन्तरता दिने जनाएको छ।