धरानको सरस्वती बाल आश्रममा २ लाख माथिको छात्रवृत्ति अक्षयकोष स्थापना

धरान। धरानस्थित सरस्वती बाल आश्रममा अध्यक्ष रुक्मनि मास्केद्वारा २ लाख २ हजार २ सय २२ रुपैयाँको छात्रवृत्ति अक्षयकोष स्थापना गरिएको छ।
यस सहयोगलाई आश्रमका लागि महत्वपूर्ण आर्थिक योगदानका रूपमा लिइएको छ।
अध्यक्ष मास्केले आफूले विगतमा पनि विभिन्न क्षेत्रमा सहयोग गर्दै आएको उल्लेख गर्दै यसपटकको सहयोग अहिलेसम्मकै उल्लेखनीय रहेको बताइन्। उनका अनुसार बालबालिकालाई खाना, किताब तथा कापी जस्ता सहयोगहरू प्रायः प्राप्त हुने भए पनि उनीहरूको दीर्घकालीन आवश्यकता आर्थिक स्थायित्व भएकाले अक्षयकोष स्थापना गरिएको हो।

कार्यक्रमका प्रमुख अतिथि लायन्स क्लबका गभर्नर बर्बर जंग थापाले लायन्स क्लब सधैं समस्यामा परेकाहरूको साथमा रहने संस्था भएको बताए। उनले विशेषगरी बालबालिकाको शिक्षा र स्वास्थ्य क्षेत्रमा क्लबले महत्वपूर्ण योगदान पुर्‍याउँदै आएको उल्लेख गरे।
उनले हरेक वर्ष लायन्स क्लबका अध्यक्षहरूले कम्तीमा एक जना बालबालिकाको शैक्षिक जिम्मेवारी लिन सके समाजमा ठूलो परिवर्तन ल्याउन सकिने धारणा व्यक्त गर्दै अक्षयकोषमा सहयोग गर्न सबैलाई आग्रह गरे।

नेपालभर सक्रिय संस्थामध्ये एक लायन्स क्लबले शिक्षालाई प्राथमिकतामा राख्दै कुनै पनि बालबालिका शिक्षाबाट वञ्चित नहोस् भन्ने उद्देश्यले विभिन्न कार्यक्रम सञ्चालन गर्दै आएको पनि उनले बताए।
कार्यक्रममा लायन्स क्लबका डिस्ट्रीक्ट गभर्नर नितु शाह, एकता श्रेष्ठ, सरस्वती बाल आश्रमका सल्लाहकार सरल कायस्थ, नैनकला न्यौपाने लगायतको उपस्थिति रहेको थियो।

आश्रमकी अध्यक्ष मास्केले बालबालिकाको शिक्षा नै उनीहरूको भविष्यको आधार भएकाले यस क्षेत्रमा गरिएको सहयोगले अनाथ तथा अभिभावकविहीन बालबालिकाको जीवन उज्ज्वल बनाउन मद्दत पुग्ने विश्वास व्यक्त गरिन्। उनले आश्रमले बालबालिकाको खान, बस्न र शिक्षासम्बन्धी सम्पूर्ण जिम्मेवारी वहन गर्दै आएको जानकारी दिइन्।

लायन्स क्लबका सदस्यहरूले जन्मदिन, वार्षिकोत्सव जस्ता अवसरमा आश्रममा आएर भोजन गराउने परम्परा रहेको उल्लेख गर्दै उनले भोजनभन्दा पनि दीर्घकालीन आर्थिक सहयोग अझ आवश्यक रहेको धारणा राखिन्। यही उद्देश्यले अक्षयकोष स्थापना गरिएको उनले स्पष्ट पारिन्।