युएन नवोदय कलेजको १६औं वार्षिकोत्सव, उत्कृष्ट विद्यार्थी सम्मानित 

धरान । धरान-१६ स्थित यु एन नवोदय कलेजले १६औं वार्षिक उत्सव तथा बिदाइ कार्यक्रम आयोजना गरेको छ ।

धरान-१५ स्थित चुम्लुङ भवनमा आयोजित वार्षिक उत्सवमा कक्षा-१२ बीएचएम र विज्ञान विषयका विद्यार्थीलाई बिदाइ समारोह आयोजना गरिएको छ । 

समारोहमा विधागत र उत्कृष्ट वर्ष विद्यार्थी घोषित गरिएको छ । कलेजले विज्ञान, व्यवस्थापन र कम्प्युटर विज्ञान विषयतर्फ उत्कृष्ट वर्ष विद्यार्थी  घोषणा गरेको हो भने विधागततर्फ वर्ष विद्यार्थी घोषणा गरेको छ । उनीहरूलाई अवार्ड र पुरस्कारद्वारा सम्मान गरिएको क्याम्पस प्रमुख डम्बरकुमार तुम्बापोले जानकारी दिए । 

'वर्ष विद्यार्थी २०८२' घोषणा, १० विधामा विद्यार्थी सम्मानित 

कलेजले उत्कृष्ट वर्ष विद्यार्थी-२०८२  (बेस्ट स्टुडेन्ट अफ द इयर) बाट विषयगततर्फ विद्यार्थीलाई सम्मान गरेको छ ।

सम्मानित हुने कक्षा-१२ का विद्यार्थीहरूमा विज्ञान विषयतर्फ प्रशन श्रेष्ठ, व्यवस्थापनतर्फ प्रतीक्षा राई, कम्प्युटर विज्ञानतर्फ रेशिका शर्मा र होटल व्यवस्थापनतर्फ सलिना राई छन् ।

कलेजले शैक्षिक सत्र २०८२ का लागि विभिन्न विधामा उत्कृष्ट हुने विद्यार्थीहरूलाई समेत 'वर्ष विद्यार्थी' अवार्डबाट सम्मानित गरेको छ । 

कलेजले आयोजना गरेको समारोह विद्यार्थीहरूको अनुशासन, सरसफाइ, नियमितता र सामाजिक सक्रियता जस्ता पक्षलाई आधार मान्दै सम्मान प्रदान गरिएको हो ।

कलेजले छात्र र छात्रा दुवै समूहमा छुट्टाछुट्टै विधामा अवार्ड वितरण गरेको थियो । 

युएन नवोदय कलेजले विद्यार्थीको बहुआयामिक क्षमतालाई कदर गर्दै १० वटा फरक शीर्षकमा अवार्ड प्रदान गरेको जनाएको छ । जसअन्तर्गत अनुशासन विधामा छात्रतर्फ रबिन्द्रकुमार श्रेष्ठ र छात्रातर्फ बिनिता घिमिरेले 'मोस्ट डिसिप्लिन्ड स्टुडेन्ट'को उपाधि प्राप्त गरे । उनीहरूले वर्षभरि कलेजको नियम पालना र मर्यादित आचरण प्रदर्शन गरेकोमा यो सम्मान दिइएको हो ।

त्यस्तै, कलेजले विद्यार्थीको व्यक्तित्व र सरसफाइलाई ध्यान दिँदै 'वेल ग्रुम्ड स्टुडेन्ट' अवार्ड अंकित विश्वकर्मा र कामना तामाङलाई प्रदान गरेको छ । कलेजको वातावरण र पेशागत मर्यादा सुहाउँदो पोशाक तथा प्रस्तुतीकरणमा उनीहरू उत्कृष्ट ठहरिएको कलेजले जनाएको छ ।

हस्पिटालिटी विधामा रिन्चेन तामाङ र जेसिका अधिकारीले आफ्नो कौशल प्रदर्शन गर्दै 'बेस्ट स्टुडेन्ट'को अवार्ड हात पारे । पर्यटन र आतिथ्य सत्कारको क्षेत्रमा उनीहरूको व्यवहार र दक्षता प्रशंसनीय रहेको कलेजले जनाएको छ ।

सहकार्य र सहयोगी भावनाका लागि 'को-अपरेटिभ स्टुडेन्ट' विधामा लाजाम कुरुम्बाङ र बेबिका चौधरी सम्मानित भए । उनीहरूले शिक्षण सिकाइ र सामूहिक क्रियाकलापमा देखाएको सहयोगी भूमिकाको कदर गरिएको कलेजले जनाएको छ । 

कलेजले शैक्षिक निरन्तरता र सामाजिक उत्तरदायित्वलाई पनि विशेष महत्त्व दिएको जनाएको छ । वर्षभरि कलेजमा सबैभन्दा बढी उपस्थित हुने 'मोस्ट रेगुलर स्टुडेन्ट' विधामा सलिना विश्वकर्माले अवार्ड जितिन् भने सामाजिक कार्य र नेतृत्वमा सक्रिय रहेकी निर्विका भुजेलले 'सोसल एक्टिभिस्ट स्टुडेन्ट' को उपाधि पाइन् ।

उत्कृष्ट विद्यार्थीलाई धरान उपमहानगरपालिकाका कार्यवाहक प्रमुख अइन्द्रविक्रम बेघा, शिक्षा अधिकृत ध्रुवराज खड्का, कलेजका अध्यक्ष तथा प्रबन्ध निर्देशक ज्ञानेश्वर झा, क्याम्पस प्रमुख डम्बरकुमार तुम्बापोलगायतले पुरस्कार हस्तान्तरण गरेका थिए । 

वार्षिक समारोहका अवसरमा उपस्थित अभिभावकका माझ विद्यार्थीले गायन, नृत्यलगायतका प्रतिभा प्रस्तुत गरेका थिए ।