अयोग्य प्रधानाध्यापकले धानेका वराहक्षेत्रका विद्यालय, शिक्षामा कायापलट गरेको मेयरको दाबी झुठो

सुनसरी । शिक्षा क्षेत्रमा सुनसरीको वराहक्षेत्रमा बेथिति बढ्दो छ । शिक्षा क्षेत्रमा निरन्तर विवादमा आइरहेको वराहक्षेत्र नगरका विद्यालय अयोग्य प्रधानाध्यापकको नेतृत्वमा चलिरहेको तथ्यहरूले देखाएको छ । 

गुणस्तरीय शिक्षाको रटान लाइरहे पनि वराहक्षेत्रको शिक्षा समितिको कार्यान्वयन पक्षमा फितलो देखिएको छ । शिक्षा समितिको अध्यक्ष नगर प्रमुख हुने स्थानीय कार्यविधिमा उल्लेख छ । नगरप्रमुख रमेश कार्कीले आफू निर्वाचित हुनुअघि शिक्षाको अवस्था भयावह रहेको र आफू आएपछि सुधार भएको वक्तव्य दिँदै आएका छन् । तर त्यसको ठीक विपरीत वराहक्षेत्रका विद्यालयहरू अयोग्य प्रधानाध्यापकले सञ्चालन गरिरहेको तथ्यले उजागर गरेको छ ।

माध्यमिक तह सञ्चालन हुँदै आएका कतिपय विद्यालयहरू प्रावि तहका शिक्षकले सञ्चालन गरिरहेका छन् भने कतिपय निमावि तहका शिक्षकले माध्यमिक तहमा प्रधानाध्यापकका रुपमा सञ्चालन गरिएरहेका छन् । त्यतिमात्र होइन वराहक्षेत्रका केही विद्यालयहरूमा त राहत शिक्षकलाई प्रधानाध्यापकको दायित्व सुम्पिएको छ । 

शिक्षा ऐन तथा नियमावलीअनुसार विद्यालयको तहअनुसार सोही तहको स्थायी दरबन्दीमा कार्यरत शिक्षकमध्ये अग्रज शिक्षक प्रधानाध्यापक हुने व्यवस्था छ ।

प्रावि तहका प्रधानाध्यापक मावि तह विद्यालयको नेतृत्व

वराहक्षेत्र-१० प्रकाशपुरमा अवस्थित भगवती माध्यमिक विद्यालयमा घनश्याम माझी प्रधानाध्यापक छन् । उनको योग्यता प्रावि तहको हो ।

वराहक्षेत्र-१ स्थित सूर्यकुण्ड माविमा पनि त्यस्तै अवस्था छ । वराहक्षेत्र-८ स्थित शिशुज्योति आधारभूत विद्यालयमा डिल्ली तिम्सिना प्रधानाध्यापक छन् । उनको योग्यता पनि प्रावि तहको हो । यी विद्यालयमा निमावि तहका वरिष्ठ शिक्षक भए पनि प्रधानाध्यापक प्रावि तहका शिक्षक छन् ।

यस्तै वराहक्षेत्रका केही मावि तहका विद्यालयमा निमावि तहका शिक्षक प्रधानाध्यापक छन् । वराहक्षेत्र-११ स्थित मोहन माविका भोजराज न्यौपाने प्रधानाध्यापक छन् । वराहक्षेत्र-३ स्थित महेन्द्र माविमा विदुर भट्टराई प्रधानाध्यापक छन् । त्यहाँ कक्षा-१२ सञ्चालनमा छ । औलिया मावि वराहक्षेत्र-१ मा कमल भण्डारी प्रधानाध्यापक छन् । 

राहत शिक्षक, विद्यालयका प्रधानाध्यापक 

वराहक्षेत्र-९ स्थित सरस्वती मावि राजाबास भीम राई प्रधानाध्यापक छन् । उनी राहत शिक्षक हुन् । यो विद्यालयमा कक्षा १२ सञ्चालनमा छ । 

जनता मावि वराहक्षेत्र-३ भरौल र जनता मावि वराहक्षेत्र-६ मा समेत राहत शिक्षक प्रधानाध्यापक छन् । 

प्रअले निर्माण गर्नुपर्ने १५ दिने कार्यक्रम 

गत चैत २२ गतेको मन्त्रीपरिसदको निर्णयअनुसार शिक्षा मन्त्रालयले १५ दिने कार्यसूची निर्माण गरी आगामी वैशाख १५ गतेदेखि विद्यालय सञ्चालन गर्न स्थानीय तह र विद्यालयलाई परिपत्र गरेको छ । 

नेपाल सरकारले शैक्षिक वर्ष २०८३ लाई लक्षित गर्दै वैशाख १५ सम्म देशव्यापी विद्यालय सुधार तथा भर्ना अभियान सञ्चालन गर्ने भएको छ । शिक्षा मन्त्रालयद्वारा सार्वजनिक गरिएको कार्यसूची अनुसार चैत्र २४–३० सम्म कार्यक्रमको प्रारम्भिक तयारी गरिनेछ भने वैशाख १ गते नयाँ वर्षको अवसरमा अभियानको औपचारिक शुभारम्भ गरिनेछ ।

कार्यक्रम अन्तर्गत वैशाख २, ३, ४ र ५ गते देशभरका सबै स्थानीय तहमा विद्यालयका प्रधानाध्यापकहरूका लागि नेतृत्व विकास, विद्यालय सुधार योजना (एसआईपी) निर्माण तथा वार्षिक लक्ष्य निर्धारणसम्बन्धी कार्यक्रम सञ्चालन गरिनेछ । यसैगरी, विभिन्न विश्वविद्यालयको सहकार्यमा शिक्षकहरूको पेशागत विकासका लागि तालिम तथा प्रशिक्षण कार्यक्रम सञ्चालन गर्ने योजना पनि रहेको छ ।

वैशाख ६ र ७ गते शिक्षा सम्मेलन आयोजना गरी शिक्षा सुधारका लागि वार्षिक लक्ष्य तथा सार्वजनिक प्रतिबद्धता तय गरिनेछ। त्यसपछि वैशाख ८, ९ र १० गते बालविकास तथा आधारभूत तहका शिक्षकहरूको मूल्याङ्कन, पाठ्यक्रम कार्यान्वयन तालिम तथा आईसीटी सम्बन्धी तालिम सञ्चालन गरिनेछ ।

वैशाख १० गतेदेखि १४ गतेसम्म शैक्षिक सामग्री निर्माण, वार्षिक क्यालेन्डर तयार, कक्षाकोठा व्यवस्थापन तथा अभिभावकसँग अन्तरक्रिया कार्यक्रम गरिनेछ । यस अवधिमा विद्यालयहरूले विद्यार्थी भर्ना अभियानलाई पनि तीव्रता दिनेछन्।

वैशाख १५ गते देशभरका विद्यालयमा भर्ना अभियान तथा नियमित पठनपाठन औपचारिक रूपमा सुरु गरिने मन्त्रालयले जनाएको छ । अभियान सफल बनाउन स्थानीय तह, शिक्षक, अभिभावक तथा सम्बन्धित निकायलाई सक्रिय सहभागिताका लागि आह्वान गरिएको छ