नेपाल बसोबास बस्ती संरक्षण समाजले धरानमा राँके जुलुश गर्ने, यस्तो छ दुई सूत्रीय माग

धरान । नेपाल बसोबास बस्ती संरक्षण समाजले आज धरानमा राँके जुलुश गर्ने भएको छ ।

साँझ ६ बजे धरानको छाताचोकमा भेला हुन समाजले आम धरानबासीलाई आह्वान गरेको छ । समाजका केन्द्रीय अध्यक्ष कुमार कार्कीका अनुसार सुकुम्बासीलाई सरकारले डोजर आतंक फैलाउँदै उठिबास लगाएकाले सरकारको रवैयाविरुद्ध विरोध जुलुश प्रदर्शन गर्ने निर्णय गरिएको हो । 

डोजर आतंक बन्द हुनुपर्ने, उठिबास गराइएका सुकुम्बासीहरूलाई उचित क्षतिपूर्ति दिनुपर्ने दुई सूत्रीय मागसहित समाजको नेतृत्वमा आम सुकुम्बासी र धरानबासीको सहभागितामा मशालसहितको विरोध जुलुश आयोजना गर्न लागिएको हो । 

यसअघि नेपाल बसोबास बस्ती संरक्षण समाजले विकल्प बिना उठिबास गरिएका नागरिकको क्षतिपूर्तिसहित तत्काल पुनःस्थापनाको माग गर्दै प्रधानमन्त्रीको ध्यानाकर्षण गराएको थियो । 

देशमा ७० लाख भूमिहिन सुकुम्बासी बस्दै आएका र तिनको व्यवस्थापनका लागि १९ ओटा आयोग बनिसकेको र भूमि सम्बन्धी आठौं संशोधन गरेको अवस्थामा सनकको भरमा उठिबास गराउनु गैरकानुनी, असामाजिक र मानव अधिकार माथिको ठाडो उल्लंघन भएको भन्दै समाज निरन्तर सरकारविरुद्ध आन्दोलित छ । 

तस्बिर-फाइल