सञ्चारकर्मीलाई पूर्ण सूचना दिँदैन धरान खानेपानी बोर्ड, करोडौं बक्यौता, वैशाख मसान्तसम्म समयसीमा

धरान । धरान खानेपानी व्यवस्थापन बोर्डले वैशाख मसान्तभित्र खानेपानीको बाँकी-बक्यौता र महशुल बुझाउन समयसीमा दिएको छ । यो अवधिभर बक्यौता तिर्नेहरूलाई महसुलमा जरिवाना छुटको समेत सार्वजनिक सूचना प्रसारण गर्दै आएको छ ।

खानेपानी बोर्डको तथ्यांकअनुसार वैशाख पहिलो सातासम्म बक्यौता नतिर्नेहरू ५ हजार ५ सय २० जना छन् । उनीहरूबाट उठ्नुपर्ने रकम ३ करोड ६६ लाख ४८ हजार ९ सय ६० रुपैयाँँ छ ।

'हामीले सूचना जारी गरेपछि बक्यौता रकम उत्साहजनक रुपमा उठिरहेको छ,' धरान खानेपानी बोर्डका कार्यकारी निर्देशक राजु पोख्रेलले भने । 

लामो समयदेखि खानेपानीको महसुल नबुझाउने ३० वटा सङ्घसंस्थाले पनि पत्राचारपछि बुझाउन आएको पोख्रेलले बताए । बक्यौता नतिर्ने सङ्घसंस्थाबाट उठ्नुपर्ने रकम वैशाख पहिलो सातासम्मको तथ्यांकअनुसार ३१ लाख  ६१ हजार ६ सय २२ रुपैयाँ २३ पैसा देखिन्छ ।

'बक्यौता नतिर्ने संस्थाहरूको सङ्ख्या महसुल तिर्न आएपछि घट्दो क्रममा छ', कार्यकारी निर्देशक पोख्रेलले भने, 'वैशाख मसान्तसम्मको समयसीमा छ ।'

खानेपानीको महसुल लामो समय नतिर्नेहरूको नामावली र विवरणबारे सञ्चारकर्मीहरूले सूचना माग गर्दा व्यवस्थापन बोर्डले सूचना उपलब्ध गराएको छैन । एकमुष्ट उठ्नुपर्ने बक्यौता रकमबारे जानकारी दिए पनि नामवली उपलब्ध गराउन आनाकानी गर्दै आएको छ । बोर्डका कार्यकारी निर्देशक पोख्रेलले व्यक्ति र सङ्घसंस्थाको विवरण उपलब्ध नगराएको बताए । 

'उहाँहरू उत्साहजनक रुपमा बक्यौता तिर्न आइरहनुभएको छ, मसान्तसम्म महसुलमा जरिवाना छुटको सुविधा पनि दिइएको छ,' पोख्रेलले भने, 'अहिले नाम सार्वजनिक गरिएको छैन ।' 

लामो समय बक्यौता रहेकाले वैशाख मसान्तपछि पनि महसुल नतिरे त्यस्ता व्यक्ति/ सङ्घसंस्थाको नाम सार्वजनिक गर्ने पोख्रेलले बताए । 'सूचना पाऊँ भनी बोर्डमा निवेदन लेखेर दिनुहोस्, बोर्डले उपलब्ध गराउँँछ ।'  कार्यकारी निर्देशक पोख्रेलले भने ।