मष्तिष्कको जटिल शल्यक्रियामा बिपी प्रतिष्ठानलाई ऐतिहासिक सफलता

धरान । बीपी कोइराला स्वास्थ्य विज्ञान प्रतिष्ठानअन्तर्गत न्यूरोसर्जरी विभागले करिब सात वर्षपछि पुनः मस्तिष्कको जटिल शल्यक्रियामा ऐतिहासिक सफलता हासिल गरेको छ । 

विभागले 'राइट मिडल सिरेब्रल आ:टरी' (एमसिए) को माइक्रोस्कोपिक क्लिपिङ शल्यक्रिया 'इमर्जेन्सी अपरेशन थिएटर'मा सफलतापूर्वक सम्पन्न गरेको हो । 

बीपी प्रतिष्ठान सर्जरी विभागका न्युरो सर्जन एसोसिएट प्रोफेसनल डाक्टर आलोक दाहालका अनुसार राजविराजकी ३९ वर्षीया बिरामी बेहोस अवस्थामा बीपी प्रतिष्ठानको  एमेर्जेन्सीमा भर्ना भएकी थिइन् ।  लामो समयदेखि उच्च रक्तचापकी बिमारी उनलाई मस्तिष्कमा रहेको 'एलोरिजम' नसा फुटेर रगत बगेको अवस्थामा प्रतिष्ठान ल्याइएको थियो ।  डा. दाहालले भने, 'प्रेसरले हानेका कारण दिमागमा हुने एउटा महत्त्वपूर्ण नलीमा गोलो आकार भएर रगत जमेपछि फुट्ने क्रममा बिरामीलाई बेहोसीको अवस्थामा अस्पताल ल्याइएको थियो । उक्त अवस्थाका बिमारीको सफल शल्यक्रिया गरिएको हो ।' 

डा. दाहालका अनुसार बीपी प्रतिष्ठानमा निकै लामो समयपछि यति ठूलो अप्रेसन न्यूरो सर्जन टिमले सहासिक रुपमा सफलतामा प्राप्त गरेको हो । 

बिरामीलाई समयमै अस्पताल ल्याउँदा र डाक्टरले समयमै उपचार गर्न पाउँदा शल्यक्रिया सफल भएको चिकित्सकको भनाइ छ । शल्यक्रिया सफल भएपछि बिरामी होसमा आएकी छन् । उनी केही बोल्न सक्ने अवस्थामा छिन् । 

डा. दाहालका अनुसार यस्तो अप्रेसन थोरै मात्र सफल हुने हुँदा बिरामीलाई समयमै अस्पताल  ल्याउनुपर्ने हुन्छ ।  यो अप्रेसनपछि बिरामी लामो समयसम्म स्वस्थ रहन्छन् । बारम्बार प्रेसरले हानेर दुर्घटना हुने जोखिम रहँदैन । 

एसिस्टेन्ट प्रोफेसर डाक्टर प्रकाशचन्द्र अधिकारीका अनुसार यो शल्यक्रिया बिरामीको उपचारमा मात्र सफलता नभएर बीपी प्रतिष्ठानको गरिमासँग पनि जोडिएको छ । उनका अनुसार यसलाई धरान तथा पूर्वी नेपालका नागरिकका लागि महत्वपूर्ण चिकित्सा उपलब्धिका रूपमा हेरिएको छ । न्यूरोसर्जरी सेवामा आएको यो उपलब्धिले प्रतिष्ठानको क्षमता, विशेषज्ञता तथा आधुनिक शल्यक्रिया सेवाप्रतिको विश्वासलाई थप बलियो बनाएको डाक्टर अधिकारीले बताए । 

शल्यक्रियामा एसोसिएट प्रोफेसर डाक्टर दाहाल र एसिस्टेन प्रोफेसर डाक्टर अधिकारीसहितको सहायक सर्जन दोस्रो वर्षका सर्जरी रेसिडेन्ट डाक्टर गौरव खनाल, एनेस्थेसिया टोलीमा डाक्टर प्राप्ति, डाक्टर ईश्वर र डाक्टर मोनिकाको समेत महत्वपूर्ण भूमिका रहेको छ । शल्यक्रियामा स्क्रब नर्सको भूमिका कन्चन र रेणुकाले सहयोग गरेका थिए । 

एसिस्टेन्ट प्रोफेसर डाक्टर दाहालले न्यूरोसर्जरी विभागको निरन्तर समर्पण, टोलीगत सहकार्य र विशेषज्ञताले यस्तो सफलता सम्भव भएको बताए ।