बेलका नगरपालिकामा थपियो आईपीडी, भिडिओ एक्स-रे सेवा, नगर प्रमुख अशोक कार्कीद्वारा उद्घाटन

रामपुर (उदयपुर) ।  बेलका नगर अस्पतालमा प्रविधिको स्तरोन्नति तथा सेवा विस्तार कार्यक्रम नगर प्रमुख अशोक कार्कीले सोमबार उद्घाटन गरेका छन् ।

बेलका नगरपालिकाले पोर्टेबल एक्स-रे सुविधा दिइरहेकामा अब अस्पतालले आईपीडी (इनडोर प्यासेन्ट डिपार्टमेन्ट) सहितको भिडिओ एक्स-रे सेवा उपलब्ध गराउने छ । 

भिडिओ एक्सरे ३२ लाख रुपैयाँको लागतमा खरिद गरिएको जनस्वास्थ्य अधिकृत विनोद मिश्रले जानकारी दिए । 'भिडिओ एक्स-रे सेवा बाह्रै महिना सञ्चालन हुने छ ।' उनले भने ।

नगर अस्पतालले ग्रामीण भिडिओ एक्स-रे सेवा र नसर्ने रोगका शिविरसमेत सञ्चालन गर्दै आएको जनस्वास्थ्य अधिकृत मिश्रले बताए । 

नगर अस्पतालमा यसअघि ओपिडी, एमरजेन्सीसहित डिजिटल एक्सरे, ल्याब सेवासहित प्रसुति सेवा सञ्चालनमा रहेको छ । यस्तै सर्पदंश उपचार, दैनिक आँखा जाँचलगायतका सेवा प्रदान गर्दै आएको छ । 

विशेषज्ञ सेवा अन्तरगत मंगलबार डेन्टल सेवा, महिनाको पहिलो बुधबार मानसिक स्वास्थ्य विशेषज्ञ सेवा नगर अस्पतालले प्रदान गर्दै आएको छ । 

अस्पतालमा प्रविधि स्तरोन्नति तथा सेवा विस्तार उद्घाटनका अवसरमा कुमारी बैङ्कको बेलका शाखाले १५ थान थ्री-सिटर आर्म चियर प्रदान गरेको छ । बैङ्कको सामाजिक उत्तरदायित्वअन्तर्गत स्वास्थ्य, शिक्षाका क्षेत्रमा योगदान गर्दै आएको शाखा प्रमुख दिवाकर कट्टेलले बताए ।

औपचारिक कार्यक्रममा बोल्दै नगरप्रमुख अशोक कार्कीले नगर अस्पतालको प्रविधिसहितक स्तरोन्नति गर्न नगर सरकार प्रतिबद्ध रहेको बताए । बेलका-९  का वडाध्यक्ष भरत घिमिरेले स्थानीय नागरिकको स्वास्थ्य समस्या स्थानीयस्तरबाटै निराकरण गर्न अत्याधुनिक स्वास्थ्य सामग्री जोड्ने काम गरिरहेको बताए ।