बिपी कोइराला स्वास्थ्य विज्ञान प्रतिष्ठानबाट १० जना बिचौलिया पक्राउ

धरान ।  धरानस्थित बिपी कोइराला स्वास्थ्य विज्ञान प्रतिष्ठानमा बिरामीलाई प्रलोभनमा पारी अवैध कमिसनको चलखेल गर्ने १० जना बिचौलियालाई प्रहरीले पक्राउ गरेको छ।

प्रतिष्ठानमा उपचारका लागि आउने बिरामीहरूलाई विभिन्न निजी मेडिकलबाट सस्तो मूल्यमा औषधि मिलाइदिने भन्दै प्रलोभनमा पारेर अवैध कमिसनको काम भइरहेको विशेष सूचनाका आधारमा प्रहरीले उनीहरूलाई नियन्त्रणमा लिएको हो।
जिल्ला प्रहरी कार्यालय सुनसरीका अनुसार, साउन २३ गते प्रतिष्ठानको इमर्जेन्सी भवन अगाडि उक्त अवैध गतिविधि गरिरहेको अवस्थामा इलाका प्रहरी कार्यालय धरान र अस्थायी प्रहरी पोस्ट घोपाबाट खटिएको संयुक्त प्रहरी टोलीले उनीहरूलाई पक्राउ गरेको हो।

पक्राउ पर्नेहरूमा सप्तरीका रन्जितकुमार चौधरी, रबिना मण्डल, भोजपुर आमचोकका हस्त श्रेष्ठ, धरान-१५ का सागर पोखरेल, धरान- ६ का मनिस बुढाथोकी, धरान-१७ का धिरोज निरौला, धरान-१८ का विनोद भट्टराई, मोरङ लेटाङकी सान्बिन किराती, 
उदयपुर चौदन्डीगढीका उमेशकुमार चौधरी, इनरुवाका रोहित मेहता छन् । 

पक्राउ परेका सबैलाई इलाका प्रहरी कार्यालय धरानमा राखिएको र घटनाबारे थप अनुसन्धान भइरहेको जिल्ला प्रहरी कार्यालय सुनसरीका सूचना अधिकारी प्रहरी नायव उपरीक्षक चन्द्रबहादुर खड्काले जानकारी दिए ।