धरानस्थित बीपी प्रतिष्ठान गेटबाहिरका ८ औषधि पसल शिलबन्दी

सुनसरी । बीपी कोइराला स्वास्थ्य विज्ञान प्रतिष्ठानको मुख्य गेटबाहिर सञ्चालनमा रहेका ८ वटा औषधि पसल शिलबन्दी गरिएका छन्। जिल्ला प्रशासन कार्यालय सुनसरी र औषधि व्यवस्था विभाग विराटनगरको संयुक्त अनुगमन टोलीले बिहीबार ती पसल शिलबन्दी गरेको हो।

शिलबन्दी गरिएका पसलमा सायांश मेडिकल हल, चाँदनी फार्मेसी, सबिन मेडिकल हल, वर्षा मेडिकल, स्काट मेडिकल हल, रितिशा फार्मेसी, सुजिता फार्मेसी र मिरियन मेडिकल हल रहेका छन्।

संयुक्त अनुगमनका क्रममा केही पसलमा सञ्चालक उपस्थित नरहेको, औषधिको खरिद–बिक्रीसम्बन्धी बिल तथा अभिलेख नराखिएको, कानुनविपरीतका प्रतिबन्धित औषधि फेला परेको तथा पसल सञ्चालनका लागि आवश्यक कागजात दुरुस्त नभेटिएको प्रशासनले जनाएको छ। ती सबै पसललाई औषधि व्यवस्था विभाग विराटनगरमा सम्पर्क गरी आवश्यक प्रक्रिया पूरा गर्न निर्देशन दिइएको छ।

अनुगमनमा परेका पसलका सञ्चालकमध्ये सायांश मेडिकल हलका सरोज लुइँटेल, चाँदनी फार्मेसीका रामनारायण चौधरी, सबिन मेडिकल हलका रबिन यादव, वर्षा मेडिकलका सचिन्द्रकुमार यादव, स्काट मेडिकल हलका भरुमत रासिद अली, रितिशा फार्मेसीका विकासकुमार यादव, सुजिता फार्मेसीका शरदकिशोर यादव र मिरियन मेडिकल हलका घनश्याम श्रेष्ठ रहेका छन्।

बीपी प्रतिष्ठानभित्रबाट प्रहरीले बुधबार विचौलियाको आरोपमा १० जनालाई पक्राउ गरी थप अनुसन्धानका लागि सात दिनको म्याद लिएपछि औषधि व्यवसायीहरू आन्दोलनमा उत्रिएका थिए। पक्राउ परेकाहरूको बिना शर्त रिहाइको माग गर्दै उनीहरूले इलाका प्रहरी कार्यालयमा धर्ना दिएका थिए। सोहीबीच संयुक्त टोलीले प्रतिष्ठान गेटबाहिरका औषधि पसलमा अनुगमन गरेको हो।

सुनसरीका प्रमुख जिल्ला अधिकारी बासुदेव घिमिरेले प्रचलित कानुन, मापदण्ड र औषधि व्यवस्था सम्बन्धी नियमअनुसार सञ्चालन नभएका पसल शिलबन्दी गरिएको बताए।