धरानबाट चोरिएको बस विराटनगरमा टुक्र्याएर कवाडीमा बिक्री

धरान:कागजपत्र बिना चोरी गरेको बस कता लैजाने ? पक्कै पनि चोरलाई सहज हुदैन । तर शुक्रबार धरान ८ स्थित एक ग्यारेजबाट यस्तै अचम्मको बस चोरी भएको छ । बिहान करिब ३ बजेर ३८ मिनेटमा धरान ८ दुर्गापथस्थित ग्यारेजबाट चोरले बस चलाएर लैजादै गरेको सिसिटिभी फुटेजमा देखिन्छ । 

यो चोरीको घटना सुनाउदा बसका मालिक (चालक पनि आफै) बिक्रम लिम्बु समेत हाँसो रोक्न सक्दैनन् । ‘मेरो बस चोरी भयो भनेर सुनाउदा कसैले नै पत्याइदिएन, हुन पनि यत्रो बस कसरी चोरी हुन्छ ? सुन्दा हाँसो उठ्छ,’ उनले सुनाए । उनको ९७४९ नम्बरको बसको अगाडि शिशामा सिद्धदेवी यातायत लेखिएको छ भने शिशा मुनिको भागमा याक्थुङ यातायात पनि लेखिएको छ । 

सुनसरीको धरानस्थित बरगाछीबाट गत बैशाख १२ गते हराएको बस विराटनगर ल्याएर त्यसका पाटपूर्जा कवाडीमा बिक्री गर्दै गरिएको अवस्थामा फेला परेको छ । व्यवसायी हरेन्द्र चेम्जोङको प्रदेश १–०२–००१–९७४९ नम्बरको बस धरानबाट विराटनगर–१२ स्थित मंगलबारे चौक नजिक रोकेर टुक्र्याउँदै कवाडीमा बिक्री गरिरहेको अवस्थामा फेला पारिएको हो ।

विराटनगर–६ स्थित गीतादेवी साहले सञ्चालन गरेको कवाडी गोदाममा बसका चक्काको भित्री फलामको रिङ्ग, इन्जिनसहितका सामाग्री प्रहरीले बरामद गरेको छ । बस भने विराटनगर १२ मा रोकिएको अवस्थामा रहेको छ । बैशाख १२ गते चोरी भएको बस खोज्दा विराटनगरसम्म ल्याएर कवाडीमा बिक्री गरिरहेको अवस्थामा फेला परेको व्यवसायी चेम्जोङले जानकारी दिए ।

यता कवाडी गोदाममा प्रहरी पुगेपछि यसका सञ्चालक गीतादेवी साह भने जोगबनीतर्फ लागेको बुझिएको छ । उनलाई सहयोग गर्दै आएका उनका ज्वाँई दिपेन्द्र साह समेत अहिले कवाडी गोदाम छोडेर भागेको प्रहरीले बताएको छ । घटनाको विषयमा प्रहरीले अनुसन्धान सुरु गरेको छ । चोरीमा संलग्न पक्राउ परेको नपरेको खुलाएको छैन ।

photo: our biratnagar