खानतलासीपछि मोरङ कारागारमा कैदीबन्दीको आन्दोलन, सुरक्षा व्यवस्था कडा

विराटनगर । जिल्ला कारागार मोरङमा सुरक्षा निकायले विशेष खानतलासी गरेपछि कैदीबन्दीहरू आन्दोलनमा उत्रिएका छन्। विराटनगर–८ हाटखोलास्थित कारागारको ‘बी ब्लक’का कैदीबन्दीले विभिन्न माग राख्दै सोमबार बिहानदेखि आन्दोलन सुरु गरेका हुन्।

कारागारभित्र हुने भनिएको आर्थिक तथा मानसिक शोषण अन्त्य गर्नुपर्ने, आफूहरूलाई अन्यायपूर्ण व्यवहार गर्न नहुनेलगायतका माग राख्दै कैदीबन्दीहरू कारागारको पूर्वी भागको छतमा चढेर नाराबाजी गरिरहेका छन्।

कारागारभित्र लागूऔषधलगायत अवैध वस्तु लुकाएर राखिएको विशेष सूचना पाएपछि सोमबार बिहान सुरक्षा निकायले ठूलो संख्यामा सुरक्षाकर्मी परिचालन गरी खानतलासी गरेको थियो। मोरङका प्रमुख जिल्ला अधिकारी युवराज कट्टेल, जिल्ला प्रहरी कार्यालय मोरङका प्रमुख प्रहरी उपरीक्षक कवित कट्टुवाललगायत जिल्ला सुरक्षा समितिका पदाधिकारीको उपस्थितिमा कारागारमा ‘सर्च’ अभियान सञ्चालन गरिएको हो।
जिल्ला प्रहरी प्रमुख कट्टुवालले कारागारमा गरिएको खानतलासीलाई नियमित सुरक्षा प्रक्रियाका रूपमा व्याख्या गरेका छन्। उनका अनुसार कारागारभित्रको सुरक्षा संवेदनशीलतालाई ध्यानमा राखेर समय–समयमा खानतलासी तथा सर्च गर्ने गरिन्छ।

खानतलासीका क्रममा हालसम्म गम्भीर प्रकृतिका अवैध वस्तु फेला परेको जानकारी प्राप्त भएको छैन। प्रशासनले केही कैदीबन्दीलाई अन्यत्र स्थानान्तरण गर्ने तयारीसमेत गरेको थियो। तर, कैदीबन्दीले अवरोध गरेपछि स्थानान्तरण प्रक्रिया तत्कालका लागि रोकिएको छ।

आन्दोलनका कारण कारागार क्षेत्रमा सुरक्षा व्यवस्था थप कडा पारिएको छ। नेपाल प्रहरी र सशस्त्र प्रहरी बलको संयुक्त टोली परिचालन गरी कारागारलाई चारैतिरबाट सुरक्षा घेरामा राखिएको छ।

स्थिति सामान्य भएपछि स्थानान्तरण गर्नुपर्ने कैदीबन्दीलाई अन्यत्र लैजाने प्रशासनको तयारी छ।

तस्बिरहरू :
१. आन्दोलनमा उत्रिएका मोरङ कारागारका कैदीबन्दी।
२. विराटनगर–८ हाटखोलास्थित मोरङ कारागार।
३. कारागार सुरक्षामा खटिएका सुरक्षाकर्मी।