सरुवाको तयारीपछि मोरङ कारागारमा दिनभर तनाव, प्रशासनिक टोलीलाई प्रवेशमै रोक

विराटनगर । विराटनगर–८ स्थित जिल्ला कारागार मोरङमा कैदीबन्दीले प्रशासनिक तथा सुरक्षा टोलीलाई भित्र प्रवेश गर्न नदिएपछि सोमबार दिनभर तनाव भएको छ । 

कारागारभित्र रहेका केही कैदीबन्दीलाई अन्यत्र स्थानान्तरण गर्ने तयारीप्रति असन्तुष्टि जनाउँदै बी ब्लकका कैदीबन्दीले आन्दोलन गरेपछि अवस्था तनावग्रस्त बनेको हो ।

लागुऔषधसहित अवैध वस्तु रहेको सूचनाका आधारमा खानतलासी तथा निरीक्षण गर्न पुगेको जिल्ला सुरक्षा समितिको टोलीलाई कैदीबन्दीले कारागारको भित्रपट्टिबाटै ताला लगाएर प्रवेशमा रोक लगाएका थिए ।

प्रमुख जिल्ला अधिकारी युवराज कटेल, मोरङका प्रहरी प्रमुख एसपी कविता कटुवालसहितको टोली सोमबार बिहान कारागार पुगेको थियो । तर, बी ब्लकमा रहेका ५ सय ६३ कैदीबन्दीले टोलीलाई भित्र प्रवेश गर्न नदिएपछि कारागार परिसरमा तनाव बढेको थियो ।

आन्दोलनमा उत्रिएका कैदीबन्दीले कारागारको छतमा चढेर टायर बाल्नुका साथै प्रशासनविरुद्ध नाराबाजी गरेका थिए । उनीहरूले जिल्ला सुरक्षा समिति र कारागार प्रशासनको विरोधमा नाराबाजी गरे पनि प्रधानमन्त्री बालेन्द्र शाह र गृहमन्त्री सुधन गुरुङको पक्षमा समेत नारा लगाएका थिए । 

कारागारभित्रैबाट बाहिरी गेटतर्फ हुलहुज्जत गर्ने प्रयाससमेत भएको सुरक्षा स्रोतले जनाएको छ ।

सरुवाको विरोधमा आन्दोलन

सुरक्षा स्रोतका अनुसार आन्दोलनको मुख्य कारण केही कैदीबन्दीलाई अन्य कारागारमा स्थानान्तरण गर्ने प्रशासनको तयारी हो । कारागारभित्र समानान्तर सत्ता सञ्चालन गरिरहेको आरोप लागेका तथा केही समयअघि पक्राउ परेर छुटेका अभिषेक गिरीसँग निकट रहेका करिब १५ जना कैदीबन्दीलाई अन्यत्र सार्ने तयारी गरिएको थियो ।

उक्त सूचना पाएपछि गिरी पक्षधर नाइके तथा भाइनाइकेहरूले सरुवा रोक्न दबाब दिँदै आन्दोलन गरेको सुरक्षा निकायको निष्कर्ष छ ।

कारागार प्रशासनलाई कैदीबन्दीले पछिल्लो चार दिनदेखि नै भित्र प्रवेश गर्न नदिएको खुलेको छ । आइतबार विपश्यना ध्यान शिविर सञ्चालनका लागि स्थान निरीक्षण गर्न पुगेको प्रमुख जिल्ला अधिकारी नेतृत्वको टोलीलाई समेत कैदीबन्दीले प्रवेशमा रोक लगाएका थिए ।

‘केही दिनदेखि कारागार प्रशासनले समेत भित्र प्रवेश पाएको छैन । कैदीबन्दीले भित्रबाटै तालाबन्दी गरेर अवरोध गरिरहेका छन्,’ कारागार प्रशासक राजन घिमिरेले भने ।

प्रमुख जिल्ला अधिकारी कटेलले कैदीबन्दीको कल्याणका लागि कार्यक्रम सञ्चालन गर्न खोज्दा अवरोध भएको बताए । उनले कारागारमा अनुशासन कायम नभए बल प्रयोग गरेर भए पनि दोषी कैदीबन्दीलाई अन्य कारागारमा स्थानान्तरण गरिने चेतावनी दिएका छन् ।

साँझपछि नाराबाजी मत्थर

मोरङ कारागारमा हाल १ हजार २ सय २८ कैदीबन्दी छन् । पछिल्लो समय कारागारभित्र सुरक्षा चुनौती बढेको सुरक्षा अधिकारीहरूको भनाइ छ ।

सोमबार साँझपख कैदीबन्दीको नाराबाजी केही मत्थर भए पनि कारागारभित्र प्रशासनको पूर्ण नियन्त्रण स्थापित भइसकेको छैन । घटनापछि सुरक्षा निकायले कारागारको अवस्था नियन्त्रणमा लिन थप रणनीति बनाउने तयारी गरेको छ ।