श्रीलंका टप्पुमा कोशी कटानको जोखिममा परेकालाई सुरक्षित स्थानान्तरण

सुनसरी । सप्तकोशी नदीको तीव्र कटानका कारण जोखिममा परेका वराहक्षेत्र नगरपालिका–६ र ९ अन्तर्गत श्रीलंका टप्पु क्षेत्रका परिवारलाई सुरक्षित स्थानमा स्थानान्तरण गरिएको छ ।

वराहक्षेत्र नगरपालिकाले सुरक्षाकर्मी र स्थानीयवासीको समन्वयमा कटानको उच्च जोखिममा रहेका परिवारलाई सुरक्षित स्थानमा बसोबासको व्यवस्थासहित स्थानान्तरण गरिएको नगरपालिकाले जनाएको छ ।

श्रीलंका टप्पु क्षेत्रअन्तर्गत चिलैया र गरैया क्षेत्रमा सप्तकोशी नदीले तीव्र कटान गरिरहेको छ । कटान नियन्त्रणका लागि सुनसरीको वराहक्षेत्र र उदयपुरको बेलका नगरपालिकाले स्थानीयवासीको सहभागितामा साधन तथा स्रोतको व्यवस्थापन गर्दै जैविक तटबन्ध निर्माण गर्दै आएका छन् । 

कटान नियन्त्रणका लागि बाँस, झिक्रासहितका रुखका हाँगा तथा बालुवा भरिएका बोरा प्रयोग गरी तटबन्ध निर्माण गरिएको छ । स्थानीयवासी र सुरक्षा निकायको समन्वयमा गरिएको प्रयासका बाबजुद नदी कटान पूर्ण रूपमा नियन्त्रणमा आउन नसकेको नगरपालिकाले जनाएको छ ।

नगरपालिकाका अनुसार नदी कटान निरन्तर भइरहेकाले जोखिममा रहेका परिवारको सुरक्षा र सुरक्षित स्थानमा स्थानान्तरणलाई प्राथमिकता दिइएको छ ।