स्थानीय समस्यामा सरकारको ध्यानाकर्षण गराउँदै सुनसरी, धनकुटा र उदयपुरका युवाको ज्ञापनपत्र

धरान । सुनसरी, धनकुटा र उदयपुरका युवाहरूले लागूऔषध नियन्त्रणदेखि सडक सुरक्षा, मानसिक स्वास्थ्य र नागरिकमैत्री सेवा प्रवाहसम्मका विषयमा सरकारको ध्यानाकर्षण गराउँदै गृहमन्त्रीसमक्ष ज्ञापनपत्र बुझाएका छन्।

युवाहरूको टोलीले गृह मन्त्रालयमा पुगेर स्थानीयस्तरमा लामो समयदेखि देखिएका सामाजिक, सुरक्षा तथा जनस्वास्थ्यसँग सम्बन्धित समस्या समाधानका लागि तत्काल पहल गर्न माग गरेको हो।

ज्ञापनपत्रमा लागूऔषध दुरुपयोग नियन्त्रण तथा पुनर्स्थापना सेवा विस्तार, गाँजा खेती नियन्त्रणसँगै वैकल्पिक तथा व्यावसायिक कृषि प्रवर्द्धन, सडक दुर्घटना न्यूनीकरणका लागि आधुनिक सीसीटीभी निगरानी प्रणाली विस्तार, आत्महत्या न्यूनीकरण तथा मानसिक स्वास्थ्य सेवा विस्तार गर्न माग गरिएको छ।

त्यसैगरी लागूऔषध र मानसिक स्वास्थ्यसम्बन्धी जनचेतना अभिवृद्धि तथा सरकारी कार्यालयबाट नागरिकमैत्री सेवा प्रवाहको व्यवस्था गर्न पनि युवाहरूले आग्रह गरेका छन्।
टोलीमा सहभागी सुनसरीका युवा अर्जुन पोख्रेलका अनुसार तीनवटै जिल्लामा देखिएका स्थानीय समस्या समाधानका लागि सरकारको ध्यानाकर्षण गराइएको हो। विशेषगरी सुनसरीको कप्तानगञ्जमा भएको घटना तथा धरानमा देखिएको विजयपुरसम्बन्धी समस्या समाधानका लागि पहल गर्न गृहमन्त्रीसमक्ष आग्रह गरिएको उनले बताए।

पोख्रेलले स्थानीयस्तरमा लामो समयदेखि देखिएका समस्या समाधान गर्न सरकार र सम्बन्धित निकाय गम्भीर बन्नुपर्ने आवश्यकता रहेको बताए। ज्ञापनपत्रमार्फत तत्काल आवश्यक पहल गर्न सरकारसँग आग्रह गरिएको उनको भनाइ छ।

युवाहरूले नागरिक सुरक्षा, सामाजिक सद्भाव तथा स्थानीय समस्याको दीर्घकालीन समाधानका लागि केन्द्र सरकार, स्थानीय प्रशासन र स्थानीय तहबीच प्रभावकारी समन्वय आवश्यक रहेको बताएका छन्।

ज्ञापनपत्रमा उल्लेख गरिएका माग कार्यान्वयनका लागि सम्बन्धित निकायलाई आवश्यक निर्देशन दिन पनि गृहमन्त्रीसमक्ष आग्रह गरिएको छ।