विराटनगरका सात आँखा अस्पताल सिल गरेकोप्रति चिकित्सक संघको आपत्ति

विराटनगर । मापदण्ड नपुगेको भन्दै विराटनगर क्षेत्रका सात वटा आँखा उपचार केन्द्र तथा अस्पताल एकैपटक सिल गरिएको घटनाप्रति नेपाल चिकित्सक संघ, कोशी शाखाले आपत्ति जनाएको छ । 

संघले अस्पताल बन्द गराउँदा शल्यक्रिया गराइसकेका तथा नियमित उपचारमा रहेका बिरामीको फलोअपसमेत प्रभावित भएकाले उनीहरूको स्वास्थ्यमा गम्भीर जोखिम उत्पन्न भएको जनाएको छ ।

संघले बिहीबार जारी गरेको प्रेस विज्ञप्तिमा नियामक निकायले अनुगमनका क्रममा मापदण्ड नपुगेको भन्दै अचानक गरेको सिलबन्दीले बिरामीको उपचारको निरन्तरता र स्वास्थ्यकर्मीको पेसागत सुरक्षामा असर परेको उल्लेख गरेको छ ।

संघका अनुसार आँखा शल्यक्रिया गराइसकेका तथा नियमित उपचारमा रहेका बिरामीको फलोअप रोकिँदा समयमा उपचार नपाएर दृष्टि गुम्ने वा अन्य गम्भीर स्वास्थ्य जटिलता उत्पन्न हुने जोखिम छ । बिरामीको स्वास्थ्यलाई जोखिममा पारेर गरिने कुनै पनि कारबाही न्यायोचित हुन नसक्ने संघको भनाइ छ ।

संघका अध्यक्ष डा. राजेन्द्र चौधरी र महासचिव डा. बालकृष्ण शाहद्वारा हस्ताक्षरित विज्ञप्तिमा अस्पतालको पूर्वाधार वा प्रशासनिक मापदण्ड पूरा नभएको विषयमा संस्था नै बन्द गर्दा त्यहाँ कार्यरत चिकित्सक, अप्टोमेट्रिस्ट, नर्स तथा प्राविधिक जनशक्ति प्रभावित भएको उल्लेख छ । 

व्यवस्थापकीय वा प्राविधिक कमजोरीको भार चिकित्सक तथा स्वास्थ्यकर्मीले बोक्नुपर्ने अवस्था अन्यायपूर्ण रहेको संघले जनाएको छ ।

संघले स्वास्थ्य सेवाको नियमन सुधारमुखी हुनुपर्नेमा जोड दिएको छ । ‘स्वास्थ्य सेवाको मापदण्ड सुधार गर्नुको मुख्य उद्देश्य बिरामीलाई अझ राम्रो सेवा दिनु हो, सेवा नै बन्द गराउनु होइन,’ विज्ञप्तिमा भनिएको छ ।

गम्भीर चिकित्सकीय लापरवाहीबाहेक अन्य प्राविधिक तथा प्रशासनिक कमी–कमजोरी भए निश्चित समयसीमा दिएर सुधारको अवसर प्रदान गर्नु स्वास्थ्य क्षेत्रमा अपनाइँदै आएको मान्य अभ्यास भएको संघको तर्क छ ।

नेपाल चिकित्सक संघ, कोशी शाखाले कोशी प्रदेश स्वास्थ्य मन्त्रालय, जिल्ला प्रशासन कार्यालय मोरङ तथा स्थानीय नियमन निकायसँग सिल गरिएका संस्थामा उपचाररत बिरामीको उपचार निरन्तरताका लागि वैकल्पिक व्यवस्था मिलाउन माग गरेको छ । साथै, सम्बन्धित स्वास्थ्य संस्थालाई मापदण्ड पूरा गर्न निश्चित समयसीमा दिएर समस्या शीघ्र समाधान गर्नसमेत संघले आग्रह गरेको छ ।