क्षेत्राधिकार विवादका बीच १४ दिनपछि खुले विराटनगरका आँखा अस्पताल

विराटनगर । क्षेत्राधिकार मिचेर शिलबन्दी गरिएको भन्दै आलोचना खेपेको जिल्ला प्रशासन कार्यालय मोरङले मंगलबार शिलबन्दी हटाएपछि विराटनगरका सातवटा आँखा अस्पताल १४ दिनपछि पुनः सञ्चालनमा आएका छन् ।

प्रदेश सरकारको अधिकार क्षेत्रमा हस्तक्षेप गरेको आरोपमा राजनीतिक दल, स्वास्थ्यकर्मी तथा सम्बन्धित संघसंस्थाबाट विरोध भएपछि प्रशासनले शिलबन्दी हटाएको हो ।

प्रशासनले मापदण्ड पूरा नगरेको दाबी गर्दै साउन २७ र २८ गते विराट आँखा अस्पताल, सञ्जीवनी आई केयर, हिमाल आँखा अस्पताल, विराट रानी आँखा अस्पताल, अखण्ड ज्योति, नेपाल आँखा अस्पताल र इफराह आँखा अस्पतालमा शिलबन्दी गरेको थियो ।

मंगलबार दिउँसो जिल्ला प्रशासन कार्यालय मोरङका प्रशासकीय अधिकृत कोविद ढकालसहितको टोलीले ती अस्पतालमा लगाइएको शिलबन्दी हटाएको हो ।

कोशी प्रदेशका स्वास्थ्य सचिव डा. कीर्तिपाल सुवेदीका अनुसार स्वास्थ्य मन्त्रालयले गठन गरेको अध्ययन समितिको प्रतिवेदन तथा विद्यमान कानुनी व्यवस्थाका आधारमा अस्पतालमा लगाइएको शिलबन्दी हटाएर पुनः सञ्चालनमा ल्याइएको हो ।

प्रशासनले अनुगमन गरी अस्पतालमा शिलबन्दी गरेपछि स्वास्थ्य मन्त्रालयले उपसचिव निर्मल भट्टराईको नेतृत्वमा अध्ययन समिति गठन गरेको थियो । समितिले प्रतिवेदन बुझाएपछि र मुख्यमन्त्री हिक्मतकुमार कार्कीले अस्पताल सञ्चालनमा ल्याउन प्रशासनलाई निर्देशन दिएपछि शिलबन्दी हटाउने वातावरण बनेको हो ।

स्वास्थ्य संस्थाजस्तो संवेदनशील क्षेत्रमा सुधारका लागि आवश्यक समयसमेत नदिई प्रशासनले एकतर्फी रूपमा शिलबन्दी गरेको भन्दै स्वास्थ्यकर्मी, सम्बन्धित संघसंस्था तथा राजनीतिक दलले विरोध जनाउँदै आएका थिए ।