चोरी गर्न घरभित्र छिरेका युवक भाग्ने क्रममा तीन तलाबाट खसे, त्यहीँ ज्यान गयो

विराटनगर । विराटनगर–४ गणेश चोकमा चोरी गर्ने उद्देश्यले घरभित्र पसेका एक युवक भाग्ने क्रममा तीन तलाबाट खसेर मृत्यु भएको छ ।

शनिबार मध्यराति करिब १२ बजे पुरुषोत्तम न्यौपानेको घरको तेस्रो तलामा प्रवेश गरेका अन्दाजी २५ देखि ३० वर्षका युवकलाई घरधनीकी छोरीले देखेपछि भाग्ने क्रममा छतबाट खसेका हुन् ।

मोरङ प्रहरीका अनुसार मृतकको पहिचान खुलेको छैन। प्रारम्भिक अनुसन्धानबाट उनी निर्माणाधीन घरको बाँसको खट तथा पानीको पाइपको सहायताले एकपछि अर्को घरका छत हुँदै न्यौपानेको घरमा पुगेको खुलेको छ ।

प्रहरीका अनुसार युवक शनिबार राति साढे ११ बजेपछि चोरी गर्ने उद्देश्यले गणेश चोक क्षेत्रका घरमा पुगेका थिए । निर्माणाधीन घर र एकअर्कासँग जोडिएका छतका कारण उनले सहजै एक घरबाट अर्को घरमा आवतजावत गर्दै चारवटा घरका छत चहारेको प्रारम्भिक अनुसन्धानबाट देखिएको छ ।

त्यसपछि उनी न्यौपानेको घरको तेस्रो तलामा पुगेका थिए। भान्साको झ्यालमा ग्रिल नभएको र स्लाइडिङ ढोका मात्र रहेकाले उनी त्यहीँबाट घरभित्र प्रवेश गरेको प्रहरीले जनाएको छ ।

त्यस बेला न्यौपानेकी छोरी प्रकृति कोठामा मोबाइल चलाएर बसिरहेकी थिइन्। भान्सासँगैको कोठाको ढोकाको ह्यान्डल पटक–पटक हल्लिएपछि शंका लागेर बाहिर निस्किँदा उनले अपरिचित युवकलाई देखेकी थिइन् ।

‘सुरुमा आफ्नै भाइ होला भन्ने लागेको थियो। तर, पटक–पटक ह्यान्डल हल्लिएपछि शंका लाग्यो। बाहिर निस्किँदा चोरसँग जम्काभेट भयो,’ प्रकृतिले प्रहरीलाई बताएकी छन्, ‘त्यसपछि म चोर–चोर भन्दै चिच्याएँ।’

उनको चिच्याहटपछि युवक आत्तिएर भान्साको झ्यालबाट बाहिर निस्किएका थिए। पक्राउ पर्ने डरले उनी दक्षिणतर्फ रहेको छिमेकी घरको छतमा हाम फालेका थिए। तर, तीन तलामाथिबाट हाम फाल्दा सन्तुलन बिग्रिएर उनी भुइँमा खसेका थिए ।

प्रहरीका अनुसार घरभित्र प्रवेश गरेको करिब तीन मिनेटमै उनी छतबाट खसेका थिए। घटनास्थलमै उनको मृत्यु भएको प्रारम्भिक अनुसन्धानबाट खुलेको छ ।

मोरङ प्रहरीका प्रवक्ता प्रहरी नायब उपरीक्षक मकेन्द्रकुमार मिश्रका अनुसार युवकले न्यौपानेको घरमा प्रवेश गर्नुअघि अन्य छिमेकीको घरमा पनि चोरीको प्रयास गरेका थिए ।

‘चोरले सुरुमा अर्कै छिमेकीको घरमा पनि प्रयास गरेको रहेछ। त्यहाँबाट लखेटिएपछि पानीको पाइपको सहायताले न्यौपानेको टेरेसमा पुगेको प्रारम्भिक अनुसन्धानमा देखिएको छ,’ मिश्रले भने ।

उनका अनुसार निर्माणाधीन घर र आपसमा जोडिएका छतका कारण युवकलाई एक घरबाट अर्को घरमा जान सहज भएको देखिएको छ ।

प्रहरीले राति करिब २ बजे घटनास्थलको कानुनी प्रक्रिया पूरा गरी शव पोस्टमार्टमका लागि कोशी अस्पताल पठाएको छ। मृतकको पहिचान खुलाउन तथा घटनाबारे थप अनुसन्धान भइरहेको प्रहरीले जनाएको छ ।