प्रदेशको २० लाख बजेट कार्यान्वयनमा ढिलाइ, श्रीलङ्का टप्पुबासीद्वारा तालाबन्दीको चेतावनी

वराहक्षेत्र । कोशी नदी कटान नियन्त्रणका लागि कोशी प्रदेश सरकारले विनियोजन गरेको २० लाख रुपैयाँ कार्यान्वयनमा वराहक्षेत्र नगरपालिकाले ढिलाइ गरेको भन्दै श्रीलङ्का टप्पुका बासिन्दा आक्रोशित बनेका छन् ।

वराहक्षेत्र नगरपालिका–६ र ९ अन्तर्गत श्रीलङ्का टप्पु क्षेत्रमा नदी कटान नियन्त्रणका लागि विनियोजित आपत्कालीन बजेट कार्यान्वयन गर्न नगरपालिकाले स्थलगत नापजाँच, इस्टिमेट र सम्झौताको प्रक्रिया अघि नबढाएको स्थानीयको आरोप छ ।

कोशी प्रदेशका मुख्यमन्त्रीसहितको टोलीले कटान क्षेत्रको निरीक्षण गरेपछि बोरा, जाली तथा बाँसको पाइलिङमार्फत तत्काल कटान नियन्त्रणका लागि २० लाख रुपैयाँ विनियोजन गरिएको थियो । उक्त रकम नगरपालिकाको खातामा समेत आइसकेको स्थानीयले बताएका छन् ।

बजेट आएपछि वडाध्यक्षको रोहवरमा टोल समिति तथा उपभोक्ता समिति गठन गरी बैंक खाता समेत खोलिसकिएको स्थानीय प्रतिनिधि जयराम माझीले बताए । तर, नगरपालिकाका प्रमुख प्रशासकीय अधिकृतले स्थलगत निरीक्षण गरी नापजाँच र इस्टिमेट तयार नगर्दा सम्झौता हुन नसकेको उनको भनाइ छ ।

माझीका अनुसार काम सुरु गर्न पटक–पटक आग्रह गर्दा पनि प्रमुख प्रशासकीय अधिकृतले विभिन्न कारण देखाउँदै प्रक्रिया अघि बढाउन आलटाल गर्दै आएका छन् । पछिल्लो समय आपत्कालीन बजेटअन्तर्गतको काम हिउँदमा गर्दा पनि हुने भन्दै तत्काल काम सुरु गर्न चासो नदेखाएको उनको आरोप छ । प्राविधिक कर्मचारीसमेत स्थलगत निरीक्षणका लागि नखटाइएको उनले बताए ।

प्रमुख प्रशासकीय अधिकृतलाई बारम्बार सम्पर्क गरी सम्झौता गर्न समय मिलाइदिन आग्रह गर्दा पनि कहिले काठमाडौं, कहिले विराटनगर, कहिले पानी परेको त कहिले अर्को वर्ष हिउँदमा गर्दा पनि हुन्छ भन्ने गैरजिम्मेवार जवाफ पाएको भन्दै स्थानीयले गुनासो गरेका छन् ।

उनीहरूले तत्काल काम हुने वातावरण मिलाइदिन आग्रह गरेका छन् । 'हाम्रो जायजेथा कोशीले लगेपछि अर्को वर्ष बाँध बाधेर हुन्छ ?' स्थानीय जयराम माझीले प्रश्न गरे, 'प्रदेश सरकारले छुट्याएको रकम हो, किन काम गर्न मानिरहेको छैन ?'

नदी कटानबाट प्रभावित क्षेत्रमा आपत्कालीन रूपमा खर्च गर्नुपर्ने रकम समयमै कार्यान्वयन नभए कोशीको बाढी जतिसुकै बेला बस्तीमा पस्ने स्थानीयले चिन्ता व्यक्त गरेका छन् ।

श्रीलङ्का टप्पुको कटान रोक्न कोशी प्रदेश सरकारले आवश्यक नीतिगत निर्णय गरी बजेट विनियोजन गर्ने कोशी प्रदेशका मुख्य मन्त्री हिक्मतकुमार कार्कीले अनुगमनका क्रममा बताएका थिए । सोहीअनुसार उनले वराहक्षेत्र र  बेलका नगरका नगरप्रमुखहरूसँग परामर्श गरेका थिए । परामर्शपछि प्रदेश सरकारले पहिलो चरणमा ५० लाख रुपैयाँ र दोस्रो चरणमा ५० लाख रुपैयाँसहित तत्काल १ करोड रुपैयाँ विनियोजन गरी काम सुरु गर्ने बताएका थिए । कोशी कटान नियन्त्रण गर्न नेपाली सेना, सशस्त्र प्रहरी र नेपाल प्रहरीसँग समन्वय गरी आवश्यक जनशक्ति परिचालन गरिने मुख्यमन्त्री कार्कीले प्रतिबद्धता जनाएका थिए । 

मुख्यमन्त्रीको प्रतिबद्धतापछि वराहक्षेत्र-६ र ९ नम्बर वडामा २०/२० लाख रुपैयाँका दरले विनियोजित रकम कार्यान्वयन हुन ढिलाइ भएको हो । 

'भोलिसम्म प्रमुख प्रशासकीय अधिकृत वा प्राविधिक टोली स्थलगत पुगेर नापजाँच गरी काम अघि नबढाए पर्सि नगरपालिका कार्यालयमा पुगेर आन्दोलन गर्ने चेतावनी दिए । त्यस क्रममा प्रमुख प्रशासकीय अधिकृतको कार्यकक्षमा तालाबन्दी गर्नुका साथै जुलुस प्रदर्शन गर्ने उनले बताए ।

कोशी तटबन्धको काम तत्काल नभए श्रीलङ्का टप्पुवासी आन्दोलित हुन बाध्य हुने उनीहरूले बताएका हुन् । 'प्रमुख प्रशासकीय अधिकृतले आलटाल गरेको देखिंदैछ, त्यस्तै हो भने नगरपालिकामा ताला लगाउन जान्छौं ।' टप्पुवासीले भने । 

बजेट कार्यान्वयन गर्न ढिलासुस्ती गरेको विषय बुझ्न वराहक्षेत्र नगरकी प्रमुख प्रशासकीय अधिकृत राधिका गिरीलाई फोन सम्पर्क गर्दा सम्पर्क गरिएको नम्बर उठेन* यद्यपि उनले 'कलब्याक' गरेर काम चाँडै भोलिदेखि नै  गर्ने बताइन् । 'तटबन्ध बनाउने नै भनेर तोकेर नआएकाले परामर्श गर्दा ढिला भएको हो, शीर्षक हेर्दा अन्य पूर्वाधारमा काम गर्न सकिने पनि देखियो, बर्खामा बजेट लगाउँदा काम गरेको नदेखिने पो हो कि भन्ने आशङ्का थियो,' उनले भनिन्, 'तटबन्ध गर्दा केही रोकथाम हुन्छ भने भोलि नै काम थाल्छौं ।' 

*अपडेट गरिएको ।