नेपालीको नाममा फर्म दर्ता गरेर व्यापार गर्ने चिनियाँ पुनः पक्राउ, अध्यागमन पठाइयो

विराटनगर । नेपाली नागरिकको नाममा फर्म दर्ता गरेर भिसाको सर्तविपरीत व्यापार सञ्चालन गरेको आरोपमा एक चिनियाँ नागरिकलाई मोरङ प्रशासनले नियन्त्रणमा लिएको छ ।

जिल्ला प्रशासन कार्यालय मोरङसहितको संयुक्त टोलीले सोमबार विराटनगर महानगरपालिका–२ डीएसपी रोडमा गरेको आकस्मिक अनुगमनका क्रममा चिनियाँ नागरिक लि जोसिज्याकलाई नियन्त्रणमा लिएको हो ।

अनुगमनका क्रममा ‘एभरपिक सप्लायर्स’ नेपाली नागरिकको नाममा दर्ता भए पनि पसलको वास्तविक व्यवस्थापन र कारोबार चिनियाँ नागरिकले गर्दै आएको पाइएको थियो ।

कस्मेटिक तथा घरायसी सामग्री बिक्री गर्ने उक्त फर्म सिन्धुपाल्चोकको बाह्रबिसे नगरपालिका–१ की राधिका बस्नेत कार्कीका नाममा दर्ता रहेको वाणिज्य, आपूर्ति तथा उपभोक्ता संरक्षण कार्यालय विराटनगरका प्रमुख दीपेशकुमार झाले जानकारी दिए ।

‘फर्म नेपालीको नाममा देखिए पनि पसलको सम्पूर्ण व्यवस्थापन र कारोबार चिनियाँ नागरिकले नै गर्दै आएको पाइयो,’ झाले भने, ‘सामानको खरिद स्रोत, राजस्वको अवस्था र व्यवसाय सञ्चालनसम्बन्धी कागजातको अध्ययन भइरहेको छ ।’

अनुगमन टोलीले पसललाई सम्पूर्ण खरिद बिल उपलब्ध गराउन निर्देशन दिएको छ । भिसाको सर्त उल्लंघन गरी व्यापारमा संलग्न भएको पाइएपछि जोसिज्याकलाई आवश्यक अनुसन्धान तथा कारबाहीका लागि अध्यागमन विभाग पठाइएको मोरङका सहायक प्रमुख जिल्ला अधिकारी पवनराज कोइरालाले जानकारी दिए ।

अनुगमनमा वाणिज्य, आन्तरिक राजस्व र जिल्ला प्रशासन कार्यालयका प्रतिनिधि सहभागी थिए । विराटनगरमा नेपाली नागरिकको नाममा फर्म दर्ता गरी चिनियाँ नागरिकले व्यापार सञ्चालन गरेको भेटिएको यो दोस्रो घटना हो ।

यसअघि गत असोज ८ गते विराटनगरस्थित सेन्ट्रल मलमा ‘योनो मार्ट’ सञ्चालन गरिरहेका चिनियाँ नागरिक सीए जिङलान पक्राउ परेका थिए । नेपालमा लगानी गर्ने उद्देश्यले उद्योग विभागबाट ‘बिजनेस भिसा’ लिएका सीएले भिसाको सर्तविपरीत खुद्रा मार्ट सञ्चालन गरेको अनुगमनका क्रममा पाइएको थियो ।

अनुगमनका क्रममा उनले सक्कल राहदानीसमेत देखाउन नसकेपछि उनलाई पनि अध्यागमन विभाग बुझाइएको थियो ।