पर्यटनमा एआई प्रयोग बढाउन नाट्टाको जोड

विराटनगर । पर्यटन व्यवसायलाई प्रविधिमैत्री बनाउँदै कृत्रिम बौद्धिकता (एआई) को प्रयोग विस्तार गर्न सरोकारवालाले जोड दिएका छन् ।

नेपाल एसोसिएसन अफ टुर एन्ड ट्राभल एजेन्ट्स (नाट्टा) कोशी प्रदेशले पर्यटन व्यवसायीलाई लक्षित गरी आयोजना गरेको चारदिने एआईसम्बन्धी तालिमको मंगलबार समापन कार्यक्रममा सहभागीले पर्यटन क्षेत्रमा प्रविधिको प्रयोग बढाउनुपर्ने बताएका हुन् ।

विराटनगर महानगरपालिकाकी उपप्रमुख शिल्पा निराला कार्कीले प्रविधिको अधिकतम प्रयोगमार्फत पर्यटन व्यवसायलाई अघि बढाउनुपर्ने बताइन् । पर्यटन क्षेत्रमा एआईको प्रयोगलाई प्राथमिकता दिनुपर्ने उनको भनाइ थियो ।

नाट्टा कोशी प्रदेशका अध्यक्ष पुण्यप्रसाद भट्टराईले पर्यटन व्यवसायीलाई एआईको प्रयोगमार्फत व्यावसायिक कामलाई प्रभावकारी बनाउन आवश्यक ज्ञान र सीप प्रदान गर्ने उद्देश्यले तालिम आयोजना गरिएको बताए ।

उनले पर्यटन क्षेत्रको विकास तथा प्रवद्र्धनमा एआईको प्रयोग विस्तार गर्नुपर्ने बताए ।

कार्यक्रममा विराटनगर महानगरपालिका–४ का वडाध्यक्ष जितन थापा, विराटनगर नागरिक उड्डयन कार्यालयका प्रमुख सुवास झा, संयुक्त राष्ट्रसंघीय विकास कार्यक्रम (यूएनडीपी) का परियोजना हेर्ने अमित विष्ट तथा सुनसरी होटल व्यवसायी संघका अध्यक्ष मनोज पुरीलगायतले पर्यटन क्षेत्रमा एआईको प्रयोग विस्तार गर्नुपर्नेमा जोड दिए ।

तालिममा पर्यटन व्यवसायी, बीएचएम अध्ययनरत विद्यार्थी तथा नाट्टाका सदस्य सहभागी थिए । चारदिने तालिमको सहजीकरण विनय शाक्यले गरेका थिए ।

यूएनडीपीको सहयोगमा आयोजित तालिममा एआईको आधारभूत प्रयोग तथा पर्यटन र ट्राभल व्यवसायमा यसको उपयोगलगायत विषयमा प्रशिक्षण दिइएको नाट्टा कोशी प्रदेशका महासचिव फडिन्द्र अधिकारीले जानकारी दिए ।