कांग्रेस मोरङ–६ को अधिवेशनमा झडप, कार्यवाहक सभापतिसहित तीन घाइते

विराटनगर । नेपाली कांग्रेस मोरङ क्षेत्र नम्बर ६ को क्षेत्रीय अधिवेशनमा बुधबार संस्थापन र इतर समूहका कार्यकर्ताबीच झडप हुँदा कार्यवाहक सभापतिसहित तीन जना घाइते भएका छन् ।

सुन्दरहरैँचामा आयोजित अधिवेशनमा क्रियाशील सदस्यताको विवादलाई लिएर तोडफोड र कुटपिट भएको हो । झडपमा कांग्रेस सहमहामन्त्री डा. डिला संग्रौलामाथि समेत हातपात भएको बताइएको छ ।

कुटपिटबाट क्षेत्रीय कार्यवाहक सभापति एवं पूर्वसांसद चुमनारायण तबदार र नेता चेतराज रेग्मीलगायत घाइते भएका छन् । उनीहरूको विराटनगरस्थित नोबेल मेडिकल कलेजमा उपचार भइरहेको छ ।

बुधबार उम्मेदवारी मनोनयन गर्ने कार्यसूची थियो । तर, अधिवेशनको औपचारिक उद्घाटनअघि नै असन्तुष्ट समूहले मञ्च र हलमा तोडफोड गरेपछि विवाद चर्किएको थियो । त्यसक्रममा कुर्सी हानाहान र हातपात भएको प्रत्यक्षदर्शीले बताएका छन् ।

क्रियाशील सदस्यता वितरण र अनलाइन फाराम भर्ने विषयमा लामो समयदेखि विवाद रहँदै आएको थियो । यही विवादका कारण मोरङ–६ मा समयमै वडा अधिवेशनसमेत हुन सकेको थिएन ।

कांग्रेस नेता डा. शेखर कोइरालाको गृहक्षेत्रसमेत रहेको मोरङ–६ मा संस्थापन पक्षले कोइरालानिकट कार्यकर्तामाथि अधिवेशन बिथोल्न तोडफोड र आक्रमण गरेको आरोप लगाएको छ ।
तर, कोइरालापक्षीय नेता देवराज तामाङले आरोप अस्वीकार गरेका छन् । उनका अनुसार क्रियाशील सदस्यतामा धाँधली भएको भन्दै लामो समयदेखि रहेको असन्तुष्टिका कारण प्रतिनिधिहरू आक्रोशित भएका हुन् ।

घटनापछि अधिवेशनस्थलमा सुरक्षाकर्मी परिचालन गरिएको छ । विवाद समाधान गरी अधिवेशन प्रक्रिया अघि बढाउन नेतृत्व तहमा छलफल भइरहेको कांग्रेस नेता रमेशजंग रायमाझीले जानकारी दिए ।