चतरा- वराहक्षेत्र सडक : तमोर करिडोरकै स्टाण्डर्डमा निर्माण गर्न फाइल उठाउँदै सडक डिभिजन 

धरान । बाढी, पहिरोको निशानामा परिरहने तमोर करिडोरको प्रस्थान विन्दु चतरा-वराहक्षेत्र सडक तमोर करिडोर आयोजनालाई हस्तान्तरण गर्ने प्रकृया अघि बढाइएको छ । 

सडक डिभिजन कार्यालय विराटनगरका प्रमुख नारायणप्रसाद निहुरेले फाइल उठाउने काम भइरहेको जानकारी दिए । 

'बारम्बार पहिरो गइरहने, बजेट पनि मर्मत सम्भारमा मात्रै हुने भएकाले हाम्रै इनिसियसनमा करिडोर आयोजनालाई हस्तान्तरण गर्ने प्रक्रिया अघि बढाएका छौं, 'डिभिजन प्रमुख निहुरेले भने, 'फाइल उठाउने काम भइरहेको छ ।' 

डिभिजनल प्रमुख निहुरेका अनुसार उक्त सडक तमोर करिडोरकै स्टाण्डर्डमा बन्न आवश्यक छ । सडक डिभिजनलाई सडक विस्तारको बजेट नहुने हुँदा करिडोरलाई नै हस्तान्तरण गरिनुपर्छ । 

'यो सडक कोशीपुलदेखि वराहक्षेत्रसम्म करिडोरकै चेनेजमा पर्छ ।' डिभिजन प्रमुख निहुरेले भने । 

चतराघाटबाट सुनसरीको प्रसिद्ध तीर्थस्थल वराहक्षेत्र जाने बाटो पहिरोका कारण बन्द हुँदै आएपछि स्थानीयले सडक स्तरोन्नति गर्न माग गर्दै आएका छन् । 

सुनसरीको धरानबाट झण्डै २० किलोमिटर, चतरा बजारबाट सात किलोमिटर र चतराघाटबाट ४ किलोमिटरको दूरीमा रहेको 'वराहक्षेत्र' तमोर करिडोरअन्तर्गत पर्छ । चतराबाट सुभाङखोलासम्म तमोर करिडोर सडक बन्ने भएपछि आयोजनाले काम गरिरहेको छ । चतराघाटदेखि वराहक्षेत्रसम्म केही खोलामा पक्की पुल निर्माण भइरहेको छ । तमोर करिडोर आयोजनाले उक्त सडक खण्डको बाहुनी खोला र धनसार खोलामा पुल निर्माण गरेको छ ।  तर सडक निर्माणको काम भने सुरु भएको छैन । 

सडक विभागअन्तर्गतको सडक डिभिजन कार्यालय विराटनगरले तमोर करिडोरलाई यो सडक हस्तान्तरण गरेपछि मात्र काम गर्न सकिने तमोर करिडोर आयोजनाले जनाएको छ । तमोर करिडोरका इन्जिनियर तथा सूचना अधिकारी एल बी बिकेले तमोर करिडोरलाई हस्तान्तरण भए करिडोर अन्तर्गत नै काम हुने बताए । उनले सडक खण्डका पुल निर्माणको काम भएको जानकारी दिए । कोशी पुलदेखि-वराहक्षेत्र गेटसम्म तमोर करिडोर चेनेजअन्तर्गत पर्ने भएपनि यो क्षेत्रमा सडक डिभिजन कार्यालयले मर्मतको काम गर्दै आएको छ ।

स्थानीयको आग्रहमा सांसद सिर्जना श्रेष्ठले सम्बन्धित मन्त्रालयमार्फत सडक विभाग हुँदै सडक डिभिजन कार्यालय मोरङमा पत्राचार गरी कार्यान्वयनको प्रक्रिया अघि बढाउन पहल गरेको राष्ट्रिय स्वतन्त्र पार्टी धरानका सभापति सुमन श्रेष्ठले बताए । वराहक्षेत्र धार्मिक तथा आन्तरिक र बाह्य पर्यटनको महत्वपूर्ण गन्तव्य भएकाले सडकको अवस्थाले तीर्थयात्री तथा पर्यटकलाई प्रत्यक्ष असर गरिरहेकाले आफ्नै नेतृत्वमा सांसदसँगै संघीय पूर्वाधार विकास मन्त्रालयमा सडक स्तरीय निर्माणका लागि निवेदन दिएको श्रेष्ठले बताए । 

चतरा-वराहक्षेत्र सडक वर्षौंदेखि जीर्ण अवस्थामा रहे पनि दिगो रुपमा स्तरोन्नित र विस्तार हुन सकेको छैन ।  यो क्षेत्रमा वार्षिक लाखौं नेपाली, भारतीय तथा  भुटानी पर्यटकहरु आउने गरेका छन् । वर्षमा आधादर्जन बढी धार्मिक मेला लाग्ने वराहक्षेत्र सडककै कारण दुर्गम बनेको छ । यो सडक खण्ड तराईलाई हिमालसँग जोड्ने तमोर करिडोरको प्रस्थान विन्दुसमेत हो ।