अपराध अनुसन्धानमा मोरङ प्रहरीको सक्रियता : चाडपर्वमा १ हजार बढी प्रहरी परिचालन

विराटनगर । मोरङ प्रहरीले पछिल्ला तीन आर्थिक वर्षमा विभिन्न अपराधमा संलग्न ४ हजार २६० जना अभियुक्तलाई पक्राउ गरेको छ । अदालतबाट दोषी ठहर भई फरार रहेका २ हजार २८९ जना प्रतिवादीलाई पनि पक्राउ गरी जरिवाना र कैद असुल गरिएको छ ।

प्रहरीका अनुसार पक्राउ परेका फरार प्रतिवादीबाट ४ करोड ५ लाख रुपैयाँभन्दा बढी जरिवाना असुल गरिएको छ भने करिब ६०० वर्ष कैद भुक्तान गराइएको छ ।

यस अवधिमा भन्सार छली गरेर ल्याइएका करोडौँ रुपैयाँ मूल्यका सामान, हुन्डी कारोबारमा संलग्न करिब २ करोड रुपैयाँ नगद, ८ हजार ५०० किलो गाँजा र ६ हजार ग्रामभन्दा बढी खैरो हेरोइनसमेत बरामद गरिएको प्रहरीको तथ्याङ्कमा उल्लेख छ ।
यसैबीच, आसन्न दसैँ, तिहार र छठ पर्वलाई लक्षित गरी मोरङ प्रहरीले जिल्लाभर विशेष सुरक्षा योजना लागू गरेको छ । 

सम्भावित चोरी, लुटपाट, कालोबजारी तथा सडक दुर्घटना नियन्त्रण गर्न जिल्लाका ३१४ रणनीतिक स्थानमा १ हजार १४० जना प्रहरी परिचालन गरिएको मोरङ प्रहरी प्रमुख एसपी कविता कटुवालले बताए ।

उनका अनुसार बैंक तथा वित्तीय संस्था, बजार र मन्दिर क्षेत्रमा सुरक्षा निगरानी बढाइएको छ । ती क्षेत्रमा ड्रोन, सीसीटीभी र तालिमप्राप्त कुकुरसमेत प्रयोग गरी २४ सै घण्टा निगरानी गरिनेछ ।

पछिल्ला तीन आर्थिक वर्षमा अपराध अनुसन्धान, फैसला कार्यान्वयन र राजस्व संकलनमा हासिल गरेको उपलब्धिलाई निरन्तरता दिँदै चाडपर्वका बेला हुन सक्ने आपराधिक गतिविधि नियन्त्रण गर्न विशेष सुरक्षा व्यवस्था मिलाइएको प्रहरीले जनाएको छ ।