उजुरी परेपछि मिठाइ पसलमा अनुगमन, मिठाइको नमुना परीक्षणमा पठाइयो

विराटनगर । ढुसी परेको मिठाइ बिक्री गरेको गुनासो आएपछि खाद्य प्रविधि तथा गुण नियन्त्रण कार्यालयले विराटनगरको ट्राफिक चोकस्थित जीवन विकास मिठाइ पसलमा अनुगमन गरेको छ ।

खाद्य निरीक्षक प्रकृति वस्तीको नेतृत्वमा गएको टोलीले अनुगमनका क्रममा उपभोक्ताले गुनासो गरेको मिठाइ पसलमा नभेटेपछि अन्य मिठाइको नमुना संकलन गरी प्रयोगशालामा पठाएको छ ।

उजुरी परेको मिठाइ बिक्री भइसकेको वा सकिएको अवस्थामा रहेको अनुगमन टोलीले जनाएको छ । त्यसपछि टोलीले सोही कच्चा पदार्थ प्रयोग गरी बनाइएका अन्य मिठाइको नमुना संकलन गरेको हो ।

खाद्य निरीक्षक वस्तीका अनुसार उपभोक्ताबाट गुनासो आएलगत्तै टोली अनुगमनमा पुगेको थियो । तर, गुनासो गरिएको मिठाइ पसलमा बाँकी थिएन । अनुगमनका क्रममा पसलको सरसफाइ अवस्था सामान्य देखिएको उनले बताइन् ।
संकलित नमुनाको परीक्षण रिपोर्ट आउन ४८ घण्टा लाग्ने वस्तीले जानकारी दिइन् । रिपोर्ट प्राप्त भएपछि मात्रै मिठाइको गुणस्तरबारे थप यकिन हुने उनले बताइन् ।