धरानमा हर्क साम्पाङ राईको धन्यवाद सभा : “सत्य बोल्न डराउनु हुँदैन”

धरान । प्रतिनिधिसभा सदस्यमा निर्वाचित Harka Sampang Rai ले धरानमा आयोजित धन्यवाद सभामा सत्य बोल्न र अन्यायविरुद्ध आवाज उठाउन नडराउन नागरिकलाई आग्रह गरेका छन्।
सुनसरीबाट भारी मतका साथ निर्वाचित भएपछि धरानमा आयोजित कार्यक्रममा बोल्दै राईले आफू आजको स्थानमा पुग्नुको मुख्य कारण सत्य र साँचो कुरा बोल्ने साहस भएको बताए। उनले भने, “यदि म डराएर नबोली बसेको भए आज यो ठाउँमा पुग्दिनथेँ। त्यसैले जनतालाई पनि सत्य र साँचो कुरामा प्रश्न उठाउन आग्रह गर्छु।”

आफू सधैं एउटै धारमा रहने व्यक्तिका रूपमा चित्रित गर्दै उनले भने, “हर्क साम्पाङ एउटा साधा रेखा हो, सधैं एकनास रहनेछ।”

राईले चुनावका क्रममा आफू मन्त्री बन्ने चर्चा चलेको विषयलाई सामान्य चुनावी रणनीतिका रूपमा व्याख्या गरे। उनका अनुसार चुनावका बेला मतदाताको मनोबल बढाउन वा प्रतिस्पर्धीलाई दबाब दिन यस्ता विषयहरू उठाइने गरिन्छ।
उनले आफूलाई यसअघि धरानको मेयरको रूपमा काम गर्ने अवसर दिएको स्मरण गर्दै भने, “मेयरको पद भनेको काम गर्ने पद हो। अब जनताले देशभरबाट तीन सिट दिएर संसदमा प्रश्न गर्ने जिम्मेवारी दिएका छन्।”

संसदमा पुगेपछि किसान, गरिब तथा सुकुम्बासीका मुद्दा जोडतोडका साथ उठाउने प्रतिबद्धता उनले व्यक्त गरे। “अब म दस गुणा बढी बोल्छु। राम्रो एजेन्डा नभएर म अरू जस्तो व्यापारीसँग तास खेल्दै बस्ने मान्छे होइन,” उनले भने।
राईले देश बेच्ने र भ्रष्टाचार गर्नेहरूलाई कडा कारबाही गर्नुपर्ने आवश्यकता पनि औंल्याए। “देश बेच्ने र भ्रष्टाचारीलाई हायल–कायल बनाउनु पर्छ। म जुन दिन संसदमा पुगेको छु, परिवर्तन गरेरै छाड्नेछु,” उनले चेतावनी दिए।

यसका साथै उनले दार्चुलामा रहेको तुईन समस्याको दीर्घकालीन समाधानका लागि झोलुङ्गे पुल निर्माण गर्ने योजना पनि सुनाए।

चुनावका क्रममा आफूलाई हराउन धेरै प्रयास भएको उल्लेख गर्दै राईले भने, “हामी दरो खुट्टा टेकेर चुनाव लड्यौं र जनताको विश्वास जित्यौं।”
कार्यक्रममा उपस्थित स्थानीयवासीले राईको स्पष्ट अभिव्यक्ति र जनताका पक्षमा बोल्ने प्रतिबद्धतालाई स्वागत गरेका थिए।