आन्जनीय पर्वत शैलीमा बन्दैछ, चतराधामस्थित हनुमान मन्दिरमा गुफा

सुनसरी । चतराधामस्थित हनुमान मन्दिर परिसरमा आन्जनीय पर्वत शैलीमा गुफा निर्माण भइरहेको छ । 

आंजनेय पर्वत रामभक्त हनुमानको जन्मस्थान मनिन्छ । यो पर्वत माता अंजना र वानरराज केसरीको पवित्र निवास मानिन्छ । जहाँ हनुमानजीको जन्म चैत्र पूर्णिमा मंगलबारका दिन भएको शास्त्रमा उल्लेख छ । 

माता अंजना फल लिनको लागि बाल हनुमानलाई एक्लै छाडेर जाँदा भोकाएका हनुमानले यही पर्वतबाट उदयमान सूर्यलाई फल सम्झेर निल्न लागेको प्रसङ्ग शास्त्रमा उल्लेख छ । 

पावनभूमि वराहक्षेत्र - १ स्थित चतराधामको श्रीराम तारकब्रह्म पीठमा निर्माण हुन गइरहेको श्री हनुमान मन्दिरको गुफा धार्मिक संरचनासँगै सनातन आस्थाको दिव्य अभिव्यक्ति बन्ने दिशामा अघि बढिरहेको पिठका साधक आकाश शर्माले बताए । 

उनका अनुसार भगवान हनुमानको प्राकट्यस्थल आन्जनीय पर्वतको प्रेरणाबाट सिर्जना गरिएको यस गुफा–मन्दिरले अध्यात्म, कला र संस्कृति तीनैको अद्भुत संगम प्रस्तुत गर्नेछ ।

यस दिव्य परियोजनाको केन्द्रमा रहने 'श्रीराम तारक ब्रह्मपिठ' का पिठाधिश्वर अनन्त श्री विभूषित जगद्गुरु महायोगी सिद्धबाबाको अवधारणाले सम्पूर्ण परिसरलाई वैदिक ऊर्जा र भक्ति भावले ओतप्रोत बनाउने पिठले उल्लेख गरेको छ ।

गुफाको संरचना प्राचीन ऋषिमुनिहरूले साधना गर्ने तपोभूमिको झल्को दिने गरी डिजाइन गरिएको छ । यहाँ प्रवेश गर्ने प्रत्येक श्रद्धालुले आत्मिक शान्ति र दिव्य अनुभूतिको अनुभूति गर्ने विश्वास गरिएको छ ।

'प्राकृतिक चट्टानको स्वरूपलाई कलात्मक रूपमा उतार्दै, गुफाभित्रको वातावरणलाई ध्यान, जप र आराधनाका लागि उपयुक्त बनाइनेछ ।' साधक शर्माले भने ।

उनका अनुसार मन्दिर परिसरमा विशाल शिल्पकला, जलधारा र हरियालीको संयोजनले स्वर्गीय दृश्य प्रस्तुत गर्नेछ । गुफाको बाहिरी भागमा निर्माण गरिने झरना र कलात्मक आकृतिहरूले राम भक्त श्रीहनुमानको अटल भक्ति, शक्ति र समर्पणलाई प्रतीकात्मक रूपमा उजागर गर्नेछन् । यसले धार्मिक पर्यटनको प्रवर्द्धन मात्र नभई स्थानीय अर्थतन्त्रमा पनि महत्वपूर्ण योगदान पुर्‍याउने अपेक्षा गरिएको छ । 

चतरा धाम ऐतिहासिक, सांस्कृतिक तथा आध्यात्मिक दृष्टिले धरतीको प्रथम धराधामको रूपमा महत्वपूर्ण तीर्थस्थलका रूपमा स्थापित भइसकेको छ । यस गुफा–मन्दिरको निर्माणसँगै यहाँको गरिमा अझ उचाइमा पुग्ने विश्वास गरिएको छ । 

देश तथा विदेशबाट आउने भक्तजनहरूका लागि यो स्थल एक अद्वितीय आध्यात्मिक गन्तव्य बन्नेछ, जहाँ श्रद्धा, शान्ति , भक्ति एवं शक्ति तीनैको अनुभूति एकसाथ प्राप्त हुने पिठले जनाएको छ । 

'श्री हनुमान मन्दिरको यो गुफा केवल पत्थर र संरचनाको संयोजन होइन, यो श्रद्धा, विश्वास र सनातन संस्कृतिको जीवित प्रतीक हुनेछ, जहाँ प्रत्येक पाइला दिव्यता तर्फ उन्मुख हुनेछ र प्रत्येक हृदयमा भक्ति जागृत हुनेछ ।' साधक शर्माले भने ।